भारत आणि श्रीलंका या दोन्ही संघांमध्ये तीन वनडे सामन्यांच्या मालिकेतील दुसऱ्या सामन्यात भारतीय संघाने मंगळावारी (२० जुलै) ३ गडी राखून विजय मिळवला आहे. यासह या मालिकेत २-० ने विजयी आघाडी घेतली आहे. मालिकेतील दुसरा सामना झाल्यानंतर आंतरराष्ट्रीय क्रिकेट परिषदेने (आयसीसी) पुरुषांची वनडे क्रमवारी जाहीर केली आहे, ज्यामध्ये शिखर धवनला मोठा फायदा झाला आहे, तर कर्णधार विराट कोहली आपल्या स्थानी कायम आहे.
शिखर धवनने श्रीलंका संघाविरुद्ध झालेल्या पहिल्या वनडे सामन्यात ८६ धावांची खेळी केली होती, तर दुसऱ्या सामन्यात २९ धावांचे योगदान दिले होते. या खेळींच्या जोरावर त्याने ७१२ रेटिंग गुणांसह २ स्थांनाही प्रगती करत १६ व्या क्रमांकावर उडी मारली आहे. तर कर्णधार विराट विराट कोहली ८७८ गुणांसह दुसऱ्या क्रमांकावर टिकून आहे. तसेच रोहित शर्मा ८१७ गुणांसह फलंदाजांच्या यादीत तिसऱ्या क्रमांकावर आहे. पाकिस्तान संघाचा सलामीवीर फलंदाज बाबर आजम हा या यादीत ८७३ गुणांसह अव्वल स्थानी कायम आहे.
ही क्रमवारी झिम्बाब्वे विरुद्ध बांगलादेश यांच्यातील ३ सामन्यांची वनडे मालिका, दक्षिण आफ्रिका विरुद्ध आयर्लंड यांच्यातील तिसरा सामना, तसेच भारत विरुद्ध श्रीलंका यांच्यातील पहिल्या दोन वनडे सामन्यांच्या आधारे जाहीर करण्यात आली आहे.
गोलंदाजांमध्ये चहल आणि हसारंगा यांना झाला फायदा
आयसीसीच्या गोलंदाजांच्या वनडे क्रमवारीत युजवेंद्र चहल २० व्या क्रमांकावर, श्रीलंका संघाचा गोलंदाज वानिंदू हसारंगा ३६ व्या क्रमांकावर आले आहेत. तसेच दक्षिण आफ्रिका संघाचा फिरकी गोलंदाज तबरेज शम्सी ३९ व्या क्रमांकावर पोहोचला आहे. गोलंदाजांच्या यादीत केवळ जसप्रीत बुमराह हा भारतीय गोलंदाज पहिल्या १० जणांमध्ये आहे. तो ६ व्या क्रमांकावर आहे.
टी२० क्रमवारीत मोहम्मद रिजवान आणि लिविंगस्टोन यांना फायदा
नुकत्याच पार पडलेल्या पाकिस्तान विरुद्ध इंग्लंड यांच्यातील टी -२० मालिकेत इंग्लंड संघाने २-१ ने विजय मिळवला होता. या मालिकेत पाकिस्तान संघाचा सलामीवीर फलंदाज मोहम्मद रिजवान आणि इंग्लंड संघाचा लियाम लिविंगस्टोन यांनी उल्लेखनीय कामगिरी केली होती. ज्याचा फायदा त्यांना आयसीसीच्या टी२० क्रमवारीमध्ये झाला आहे. रिजवान आयसीसीच्या टी -२० फलंदाजांच्या क्रमवारीत ७०९ गुणांसह ७ व्या क्रमांकावर पोहोचला आहे. तर लिविंगस्टोन २७ व्या क्रमांकावर पोहोचला आहे.
महत्त्वाच्या बातम्या –
धोनीसाठी जिंकायची आहे चौथ्यांदा आयपीएल ट्रॉफी, सुरेश रैनाने केले मन जिंकणारे वक्तव्य
“विजय मिळवणेच श्रीलंका संघ विसरुन गेला आहे”, दिग्गज क्रिकेटरकडून आपल्याच देशाच्या संघाला घरचा आहेर
