कर्णधार स्मृती मानधनाच्या नेतृत्वाखाली (Captain Smriti Mandhana Under Captaincy) भारतीय महिला क्रिकेट संघाने झिम्बाब्वेविरुद्धची 3 सामन्यांची वनडे मालिका 3-0 ने जिंकली आहे. तिसऱ्या वनडे सामन्यात भारताने 8 विकेट्सने शानदार विजय मिळवत मालिकेत झिम्बाब्वेचा धुव्वा उडवला. याआधी भारताने टी-20 मालिकेतही झिम्बाब्वेचा 3-0 ने पराभव केला होता. (Odi series between IND W vs ZIM W)
वडोदरा येथे झालेल्या तिसऱ्या वनडे सामन्यात प्रथम फलंदाजी करताना झिम्बाब्वेचा संघ 131 धावांवर सर्वबाद झाला. प्रत्युत्तरात भारतीय संघाने 132 धावांचे लक्ष्य अवघ्या 17 षटकांत 2 विकेट्स गमावून पूर्ण केले.
भारताकडून प्रतिका रावलने (Pratika Rawal) नाबाद 59 तर शेफाली वर्माने (Shefali Verma) नाबाद 51 धावांची अर्धशतकी खेळी केली. त्याआधी भारतीय फिरकीपटू वैष्णवी शर्माने शानदार गोलंदाजी करत 5 विकेट्स घेतल्या. या कामगिरीसाठी तिला सामनावीर पुरस्काराने गौरवण्यात आले.
132 धावांच्या लक्ष्याचा पाठलाग करण्यासाठी मैदानात उतरलेल्या भारतीय संघाची सुरुवात चांगली झाली नाही. सलामीवीर यास्तिका भाटिया खाते न उघडताच बाद झाली. त्यानंतर प्रतिका रावलने हरलीन देओलसोबत डाव सावरला. दोघींनी दुसऱ्या विकेटसाठी 59 धावांची भागीदारी केली. हरलीन 19 चेंडूंत 19 धावा करून बाद झाली. यानंतर प्रतिका रावल आणि शेफाली वर्माने आक्रमक फलंदाजी करत भारतीय संघाला विजय मिळवून दिला. दोघींनी तिसऱ्या विकेटसाठी नाबाद 74 धावांची भागीदारी केली.
प्रतिका रावलने 56 चेंडूंत 4 चौकार आणि 3 षटकारांच्या मदतीने नाबाद 59 धावा केल्या. तर शेफाली वर्माने अवघ्या 26 चेंडूंत 6 चौकार आणि 3 षटकारांसह नाबाद 51 धावा ठोकल्या. या दोघींच्या अर्धशतकी खेळीमुळे भारताने 17 षटकांतच लक्ष्य गाठले आणि 8 विकेट्सने सामना जिंकला.
तत्पूर्वी, नाणेफेक जिंकून प्रथम फलंदाजी करण्याचा निर्णय घेतलेल्या झिम्बाब्वेच्या संघाला भारतीय गोलंदाजांसमोर मोठी धावसंख्या उभारता आली नाही. झिम्बाब्वेचा संपूर्ण संघ 39.5 षटकांत 131 धावांवर सर्वबाद झाला.
भारताकडून वैष्णवी शर्माने 5 विकेट्स घेत उत्कृष्ट कामगिरी केली. तिच्या वनडे कारकिर्दीतील हा केवळ तिसरा सामना होता. याच सामन्यात तिने 39 धावा देत 5 विकेट्स घेण्याची सर्वोत्तम कामगिरी नोंदवली. याआधी याच मैदानावर झालेल्या मागील वनडे सामन्यातही तिने 4 विकेट्स घेतल्या होत्या.
झिम्बाब्वेची अवस्था 54 धावांवर 4 विकेट्स अशी झाली होती. त्यानंतरही संघाला सावरता आले नाही. झिम्बाब्वेकडून सलामीवीर मोडेस्टर मुपाचिक्वाने सर्वाधिक 37 धावा केल्या. तिने 48 चेंडूंचा सामना केला. झिम्बाब्वेच्या सात फलंदाजांना दुहेरी आकडाही गाठता आला नाही. वैष्णवी शर्माव्यतिरिक्त क्रांती गौड आणि सायली सतघरे यांनी प्रत्येकी 2 विकेट्स घेतल्या. भारतीय महिला संघाने वनडे मालिकेत झिम्बाब्वेचा 3-0 ने, तर टी-20 मालिकेतही 3-0 ने पराभव करत दोन्ही मालिका आपल्या नावावर केल्या.
