मोहाली (Mohali Test) येथे खेळल्या जात असलेल्या भारत विरुद्ध श्रीलंका (INDvSL) कसोटी मालिकेतील पहिल्या कसोटीच्या दुसऱ्या दिवशी भारतीय संघाने सामन्यावर आपली पकड मजबूत केली. पावणे सहाशे धावांचा डोंगर उभारल्यानंतर गोलंदाजांनी श्रीलंकेचे प्रमुख चार बळी मिळवत दुसरा दिवस भारतीय संघाच्या नावे केला. नाबाद १७५ धावांची खेळी करणारा भारताचा अष्टपैलू रवींद्र जडेजा (Ravindra Jadeja) याच्या नावे हा दिवस राहिला.
पहिल्या दिवशी भारतीय संघाने रिषभ पंत व हनुमा विहारी यांच्या अर्धशतकाच्या जोरावर ३५० पेक्षा अधिक धावा बनविल्या दुसऱ्या दिवशी रविचंद्रन अश्विन व रवींद्र जडेजा ही नाबाद जोडी मैदानावर उतरली. त्यांनी कसलेल्या फलंदाजाप्रमाणे फलंदाजी करत शतकी भागीदारी केली. अश्विन ६१ धावा काढून माघारी परतला. मात्र, त्यानंतर रवींद्र जडेजाने डावाची सूत्रे हाती घेतली. त्याने तळाच्या फलंदाजांना साथीला घेऊन आपल्या कारकिर्दीतील दुसरे शतक झळकावले. त्यानंतर तो अधिक आक्रमक झाला. चहापानासाठी २० मिनिटांचा अवधी शिल्लक असताना भारतीय कर्णधार रोहित शर्माने डाव घोषित करण्याचा निर्णय घेतला. भारताने ८ बाद ५७४ धावांवर आपला डाव घोषित केला. जडेजाने नाबाद १७५ धावांची खेळी केली. श्रीलंकेसाठी लकमल, फर्नांडो व लसिथ एम्बुलडेनिया यांनी प्रत्येकी दोन बळी मिळवले.
भारताने उभारलेल्या मोठ्या धावसंख्येचा पाठलाग करताना श्रीलंकेला दिमुथ करुणारत्ने व लाहिरू थिरीमन्ने यांनी चांगली सुरुवात दिली. संघाच्या ४८ धावा झाल्या असताना अश्विनने थिरीमन्नेला बाद करून भारताला पहिले यश मिळवून दिले. त्यानंतर श्रीलंकेचे गडी नियमित अंतराने बाद होत गेले. दुसऱ्या दिवसाचा खेळ थांबला तेव्हा श्रीलंकेने ४ बाद १०८ धावा बनविल्या होत्या. पथुम निसंका २६ तर चरिथ असलंका एका धावेवर नाबाद आहे. भारतासाठी अश्विनने दोन तर जडेजा व शमी यांनी प्रत्येकी एक बळी मिळविला.
महत्वाच्या बातम्या-
दक्षिण आफ्रिका महिला संघाची विश्वचषकात विजयी सलामी; बांगलादेशला चारली धूळ (mahasports.in)
शेन वॉर्नची शेवटची २० मिनिटे, नेमकं काय घडलं होतं? वाचा संपूर्ण घटनाक्रम (mahasports.in)