भारत आणि न्यूझीलंड (IND vs NZ) यांच्यातील तीन सामन्यांच्या वनडे मालिकेचा तिसरा आणि अंतिम सामना उद्या म्हणजेच रविवार, 18 जानेवारीला खेळला जाणार आहे. सध्या ही मालिका 1-1 अशा बरोबरीवर आहे. अशा परिस्थितीत जो संघ तिसरी वनडे जिंकेल, मालिका त्यांच्या नावावर होईल. भारतीय संघ 2019 पासून मायदेशात वनडे मालिका हरलेला नाही. दुसरीकडे, न्यूझीलंडने भारतात कधीही वनडे मालिका जिंकलेली नाही. त्यामुळे दोन्ही संघ हा सामना जिंकण्यासाठी आपली पूर्ण ताकद लावतील.
भारत आणि न्यूझीलंडमधील तिसरी वनडे इंदूरच्या होळकर स्टेडियमवर खेळली जाईल. या मैदानावर टीम इंडियाने आतापर्यंत एकूण सात वनडे सामने खेळले आहेत. या काळात भारतीय संघाने सर्व सामन्यांत विजय मिळवला आहे. येथे भारताचा विजयाचा रेकॉर्ड 100 टक्के आहे, जो कीवी (न्यूझीलंड) संघाला धडकी भरवण्यासाठी पुरेसा आहे. रविवारी शुबमन गिलच्या (Shubman gill) नेतृत्वाखाली टीम इंडिया या मैदानावर आठवा वनडे सामना जिंकण्याचा प्रयत्न करेल.
इंदूरच्या होळकर स्टेडियमची खेळपट्टी फलंदाजांसाठी स्वर्ग मानली जाते. येथे धावांचा डोंगर उभा राहतो. पुन्हा एकदा येथे ‘फ्लॅट विकेट’ असेल, जिथे धावा करणे सोपे जाईल. मात्र, नवीन चेंडू सुरुवातीला थोडा स्विंग होऊ शकतो, पण चेंडू जुना झाला की धावा करणे अधिक सोपे होईल.
भारत आणि न्यूझीलंडचा हा सामना काळ्या मातीच्या खेळपट्टीवर खेळला जाईल. हवामानाबद्दल बोलायचे झाले तर पावसाची शक्यता नाही, पण ‘दव’ (Dew) पडण्याची शक्यता आहे. अशा परिस्थितीत टॉस जिंकणारा संघ प्रथम गोलंदाजी करण्याचा निर्णय घेऊ शकतो. जरी न्यूझीलंडने दुसऱ्या वनडेत भारताचा पराभव केला असला, तरी आमचे मॅच प्रेडिक्शन मीटर सांगत आहे की या सामन्यात टीम इंडियाचे पारडे जड आहे. टॉसवर बरेच काही अवलंबून असेल, पण मुकाबला 70-30 असाच आहे. आमच्या मते, तिसऱ्या वनडेत टीम इंडियाचा विजय होईल.
भारताची संभाव्य प्लेइंग इलेव्हन: रोहित शर्मा, शुबमन गिल (कर्णधार), विराट कोहली, श्रेयस अय्यर, केएल राहुल (यष्टिरक्षक), रवींद्र जडेजा, नितीश कुमार रेड्डी, हर्षित राणा, कुलदीप यादव, मोहम्मद सिराज आणि अर्शदीप सिंग.
न्यूझीलंडची संभाव्य प्लेइंग इलेव्हन: डेव्हन कॉनवे, हेन्री निकोल्स, विल यंग, डॅरिल मिशेल, ग्लेन फिलिप्स, मिशेल हे (यष्टिरक्षक), मायकेल ब्रेसवेल (कर्णधार), जेडन लेनॉक्स, झकारी फॉल्क्स, काइल जेमिसन आणि क्रिस्टिन क्लार्क.
