हैद्राबाद। भारताने आज(14 आक्टोबर) विंडिज विरुद्ध दुसऱ्या कसोटी सामन्यात तिसऱ्याच दिवशी 10 विकेटने विजय मिळवत दोन सामन्यांच्या कसोटी मालिकेत व्हाईटवॉश दिला आहे. या सामन्यात भारताकडून 10 विकेट घेत उमेश यादवने विजयात मोलाचा वाटा उचलला.
विंडिजने या सामन्यात भारतासमोर विजयासाठी 72 धावांचे आव्हान ठेवले होते. या आव्हानाचा पाठलाग भारताचा सलामीवीर फलंदाज पृथ्वी शॉ आणि केएल राहुलने 16.1 षटकातच सहज पूर्ण केला. शॉने 45 चेंडूत तर राहुलने 53 चेंडूत प्रत्येकी 33 धावा केल्या.
तत्पुर्वी विंडिज दुसऱ्या डावात 56 धावांनी पिछाडीवर होते. त्यांच्या दुसऱ्या डावाची सुरुवातही अडखळत झाली. त्यांचे सलामीवीर फलंदाज क्रेग ब्रेथवेट आणि कायरन पॉवेल हे दोघेही भोपळाही न फोडता बाद झाले.
मात्र त्यानंतर शिमरॉन हेटमेयर(17) आणि शाय होपने(28) डाव सांभाळला होता. परंतू हे दोघेही 39 धावांची भागीदारी करुन अनुक्रमे 13 आणि 14 व्या षटकात बाद झाले. यानंतर मात्र विंडिजच्या अन्य फलंदाजांनी नियमित कालांतराने आपल्या विकेट गमावल्या.
हेटमेयर आणि होप व्यतिरिक्त सुनील अँब्रीस(38), कर्णधार जेसन होल्डर(19) आणि देवेंद्र बिशू(10) यांनाच दोन आकडी धावसंख्या पार करता आली. अन्य फलंदाजांना मात्र खास काही करता आले नाही.
या डावात भारताकडून उमेश यादवने सर्वाधिक 45 धावांत 4 विकेट घेतल्या. तसेच अन्य गोलंदाजांपैकी रविंद्र जडेजा(3/12), कुलदीप यादव(1/45) आणि आर अश्विन(2/24) यांनी विकेट घेतल्या.
त्याआधी भारताने तिसऱ्या दिवसाची पहिल्या डावातील 4 बाद 308 धावांपासून सुरुवात केली. मात्र भारताला यात फक्त 59 धावांची भर घालता आली.
दुसऱ्या दिवसाखेर नाबाद असलेले रिषभ पंत(92) आणि अजिंक्य रहाणे(80) तिसऱ्या दिवशी लवकर बाद झाले. या दोघांचेही शतक थोडक्यात हुकले.
भारताने पहिल्या डावात सर्वबाद 367 धावा केल्या. विंडिजकडून कर्णधार जेसन होल्डरने या डावात सर्वाधिक 5 विकेट घेतल्या.
तसेच विंडिजने पहिल्या डावात सर्वबाद 311 धावा केल्या होत्या. यात विंडिजकडून रोस्टन चेसने 106 धावा करत शतक केले होते. तर कर्णधार होल्डरने 52 धावांची अर्धशतकी खेळी केली होती. या डावात भारताकडून उमेश यादवने सर्वाधिक 88 धावांत 6 विकेट्स घेतल्या होत्या.
संक्षिप्त धावफलक-
विंडिज पहिला डाव – सर्वबाद 311 धावा
भारत पहिला डाव – सर्वबाद 367 धावा
विंडिज दुसरा डाव – सर्वबाद 127 धावा
भारत दुसरा डाव – बिनबाद 75 धावा
महत्वाच्या बातम्या-
–२१ व्या शतकात अशी कामगिरी करणारा उमेश यादव पहिला भारतील गोलंदाज
–उत्तम फलंदाज असला तरी कोहलीला कर्णधार म्हणून अजून सिद्ध करायचे आहे…
–भारताच्या या दिग्गजाने रिषभ पंतची गिलख्रिस्टशी केली तुलना