आयपीएल २०२६ च्या उर्वरित सामन्यांसाठी रॉयल चॅलेंजर्स बंगळुरूचा सलामीवीर फिल सॉल्ट भारतात परतला आहे. त्याला चिन्नास्वामी स्टेडियमवर दिल्ली कॅपिटल्स विरुद्ध (१८ एप्रिल) क्षेत्ररक्षण करताना बोटाची दुखापत झाली होती. तो पुढील काही तपासणीसाठी इंग्लंडला परतला होता.
बंगळुरूचा पुढील सामना आज (१० मे) रायपूरमध्ये मुंबई इंडियन्सविरुद्ध आहे. रजत पाटीदारच्या नेतृत्वाखालील बंगळुरूला मागील दोन सामन्यांत पराभवाचा सामना करावा लागला आहे, मात्र गुणतालिकेत नवव्या स्थानावर असलेल्या मुंबईला पराभूत करत बंगळुरूला पहिल्या स्थानी पोहोचण्याची संधी आहे.
सॉल्ट इंग्लंडला परतला असता, त्याच्या पुढील सामन्यांसाठीच्या सहभागाबाबत अनिश्चितता होती. आता तो दुखापतीतून पूर्णपणे बरा झाल्यानंतर भारतात परतला आहे. तो आता बंगळुरूच्या आगामी सामन्यांसाठी उपलब्ध असून संघाची ताकद वाढली आहे, असे म्हणणे योग्य होईल.
कोलकाता नाईट रायडर्सचे माजी संचालक जॉय भट्टाचार्य यांनी सॉल्ट भारतात परतण्याबद्दल माहिती दिली. त्यांनी क्रिकबझवर म्हटले, “आमच्या प्रोडक्शन टीमपासून ते प्रत्येकजण फिल सॉल्ट कुठे आहे हे पाहण्यासाठी सोशल मीडियावर धावपळ करत आहे. तर तो भारतात दाखल झाला आहे.”
आयपीएलच्या या १९ व्या हंगामावेळी अनेक विदेशी खेळाडू त्यांच्या वैद्यकिय तपासणीसाठी त्यांच्या मायदेशी गेले होते. पॅट कमिन्सनेही स्कॅन केल्यानंतर क्रिकेट ऑस्ट्रेलियाकडून परवानगी मिळवण्यासाठी यापूर्वी सनरायझर्स हैद्राबाद संघ सोडला होता.
“सॉल्ट रायपूरला जाईल की नाही, हा प्रश्न आहे. जर तो रायपूरला पोहोचला तर त्याच्या असण्याने संघाला बळ मिळेल”, असे भट्टाचार्य पुढे म्हणाले आहेत.
दुखापत होण्याआधी सॉल्ट चांगलाच फॉर्ममध्ये होता. त्याने ६ डावांमध्ये ३३.६७ च्या सरासरीने आणि १६८.३३ च्या स्ट्राईक रेटने २०२ धावा केल्या होत्या. त्याच्या अनुपस्थितीत जेकब बेथेलला संघात स्थान मिळाले. तथापि, डावाची सुरुवात करताना चार सामन्यांमध्ये अनुक्रमे १४, २०, ५ आणि ४ अशा धावा करून हा डावखुरा फलंदाज प्रभाव पाडण्यात अपयशी ठरला आहे. तो केवळ ४३ धावाच करू शकला आहे.
