क्रिकेटविश्वातून मोठी बातमी समोर येत आहे. स्टीफन फ्लेमिंग यांनी चेन्नई सुपर किंग्जच्या मुख्य प्रशिक्षकपदाचा राजीनामा दिला आहे. सुपर किंग्ज आणि स्टीफन फ्लेमिंग यांनी परस्पर संमतीने वेगळे होण्याचा निर्णय घेतला आहे, ज्यामुळे इंडियन प्रीमियर लीगच्या (आयपीएल) इतिहासातील सर्वात यशस्वी आणि दीर्घकाळ टिकलेल्या भागीदारींपैकी एकाचा शेवट झाला आहे. सीएसकेने एक निवदेनही जाहीर केले आहे.
सीएसकेपासून विभक्त होण्याबाबत फ्लेमिंगने निवेदनात म्हटले, “खेळाच्या जगात अठरा वर्षे हा एक मोठा कालखंड असतो आणि मी निरोप घेताना केवळ कृतज्ञतेची भावना बाळगत आहे. चेन्नई सुपर किंग्जसोबतचा माझा कार्यकाळ हा माझ्या प्रशिक्षकपदाच्या कारकिर्दीतील एक अत्यंत अभिमानास्पद अनुभव राहिला आहे. आम्ही मिळवलेल्या यशाचा मला सार्थ अभिमान आहे.”
“आम्ही मिळून अविस्मरणीय विजय साजरे केले, कठीण प्रसंगांवर मात केली आणि अशा आठवणी निर्माण केल्या ज्या माझ्यासोबत सदैव राहतील. सीएसके (CSK) नेहमीच माझ्या हृदयाच्या जवळ राहील आणि आगामी काळातही मी या संघाला नेहमीच प्रोत्साहन देत राहीन,” असेही फ्लेमिंगने पुढे म्हटले आहे.
सीएसकेच्या मालक रूपा गुरुनाथ म्हणाल्या, “या फ्रँचायझीच्या जवळपास संपूर्ण प्रवासात स्टीफन फ्लेमिंग हे आमच्या कोचिंग युनिटचे हृदय राहिले आहेत. जवळपास दोन दशकांपासून, त्यांनी आमची ओळख, दूरदृष्टी आणि उत्कृष्टतेचा ध्यास घडवण्यात मदत केली आहे. आम्ही त्यांच्या अढळ वचनबद्धतेबद्दल, उत्कटतेबद्दल आणि नेतृत्वाबद्दल मनःपूर्वक कृतज्ञता व्यक्त करतो. मैदानावरचा आमचा एकत्र प्रवास जरी आता संपत असला, तरी ते संघाच्या वारशाचा एक अविभाज्य भाग म्हणून कायम राहतील.”
“या प्रवासाच्या अगदी सुरुवातीच्या दिवसांपासून, फ्लेमिंगने केवळ आमचा खेळच नव्हे, तर एक फ्रँचायझी म्हणून आम्हाला काय बनायचे आहे, हे निश्चित करण्यात मदत केली. त्याने सातत्य, नम्रता आणि संघाला प्राधान्य देण्यावर आधारित एक संस्कृती निर्माण केली,” असे सीएसकेचे व्यवस्थापकीय संचालक केएस विश्वानाथन यांनी म्हटले आहे.
“लोकांना समजून घेण्याची आणि संघातील प्रत्येक खेळाडूकडून सर्वोत्तम कामगिरी करून घेण्याची त्याची क्षमता ही त्याची सर्वात मोठी ताकद आहे. त्यांचा प्रभाव सीमांच्या पलीकडेही पसरलेला आहे, आणि हा विलक्षण प्रवास एकत्र केल्याचा आम्हाला अभिमान आहे,” असेही विश्वानाथन यांनी पुढे म्हटले आहे.
फ्लेमिंगचा सीएसकेसोबतचा कार्यकाळ
फ्लेमिंग आयपीएलच्या पहिल्याच आवृत्तीपासून (२००८) सीएसकेशी जोडले गेले. २००८ मध्ये खेळाडू म्हणून तर २००९ मध्ये मुख्य प्रशिक्षक म्हणून कारभार स्वीकारला. त्याच्या मार्गदर्शनाखाली सीएसकेने ५ आयपीएल ट्रॉफी आणि २ चॅम्पियन्स लीग ट्वेंटी २० स्पर्धा जिंकल्या. तसेच संघाने १२ वेळा आयपीएल प्लेऑफ्समध्ये प्रवेश केला आणि १० वेळा अंतिम सामना खेळला. (Stephen Fleming Step Down as CSK Head Coach)
