चेन्नई, ३० जानेवारी २०२४: महाराष्ट्राची जलतरणपटू पलक जोशीने तिच्या २०० मीटर बॅकस्ट्रोकमधील राष्ट्रीय विक्रमात सुधारणा करताना खेलो इंडिया युवा स्पर्धा २०२३ मध्ये सुवर्णदपकाची कमाई केली. महाराष्ट्राने सुवर्णपदकांचे अर्धशतक साजरे करताना आज नऊ सुवर्णपदकांची भर घातली. तामिळनाडूची वेटलिफ्टर आर पी कीर्तना हिने मंगळवारी स्नॅच प्रकारात राष्ट्रीय युवा विक्रम मोडून मुलींच्या ८१ किलो गटात विजेतेपद पटकावले.
२०२२ च्या आशियाई क्रीडा स्पर्धेत भारताचे प्रतिनिधित्व करणाऱ्या पलक जोशीने निर्विवाद वर्चस्व गाजवले. तिने २:१८.५९ सेकंदाची वेळ नोंदवली आणि मागील वर्षी जुलै महिन्यात हैदराबाद येथील राष्ट्रीय जलतरण अजिंक्यपद स्पर्धेतील स्वतःचाच २:१८.९० सेकंदाचा वरिष्ठ गटातील राष्ट्रीय विक्रम मोडला. भारतीय जलतरण महासंघ या कामगिरीला ‘सर्वोत्कृष्ट भारतीय कामगिरी’ म्हणून ओळखेल, कारण SFI फक्त राष्ट्रीय खेळांमधील सर्वोत्तम कामगिरीचा राष्ट्रीय विक्रम म्हणून विचार करेल.
तेलंगणाच्या श्री नित्या सागीने २:२५.८३ सेकंद वेळेसह रौप्य, तर कर्नाटकच्या नैशाने २:२५.८३ सेकंदांसह कांस्यपदक जिंकले.
वर्ल्ड चॅम्पियन आणि २०२२ आशियाई क्रीडा स्पर्धेतील कांस्यपदक विजेती अदिती गोपीचंद स्वामीने नेहरू पार्क येथील तिरंदाजी रेंजमध्ये महाराष्ट्राला कंपाऊंड मुली व मिश्र सांघिक गटात सुवर्णपदक जिंकले. पृथ्वीराज घाडगे आणि शर्वणी शेंडे यांनी रिकर्व्ह मिश्र सांघिक फायनल जिंकली. मुलींच्या रिकर्व्ह प्रकारात शेंडेने रौप्यपदक, तेजल साळवेने कंपाऊंड मुलींमध्ये रौप्यपदक तर मिहीर अपारने मुलांच्या कंपाऊंड स्पर्धेत कांस्यपदक पटकावले.
मदुराईमध्ये, महाराष्ट्र खो-खो संघाने दोन्ही सुवर्णपदके जिंकली. मुलांनी दिल्लीचा ४०-१० असा, तर मुलींनी ओडिशाचा ३३-२४ असा पराभव केला.
तारिणी सुरी आणि श्रावणी वाळेकर यांनी नंतर TNPESU बॅडमिंटन हॉलमध्ये मुलींच्या दुहेरीच्या अंतिम फेरीत ओडिशाच्या प्रगती परिदा आणि विशाखा टोप्पो यांचा २१-१३, २०-२२, २१-१६ असा पराभव करत महाराष्ट्राला ५० सुवर्णपदकांवर नेले.
याआधी तामिळनाडूची वेटलिफ्टर आर पी कीर्तनाने स्नॅच, क्लीन अँड जर्कमध्ये राष्ट्रीय युवा विक्रम मोडला आणि मुलींच्या ८१ किलो गटात सुवर्णपदक जिंकले. कीर्तनाने स्नॅचमध्ये ८४ किलो आणि क्लीन अँड जर्कमध्ये १०३ किलोसह एकूण १८८ किलो वजन उचलले. तामिळनाडूच्याच ओविया के हिला १८४ किलोसह रौप्यपदकावर आणि उत्तर प्रदेशच्या संतोषी चौधरीला १६२ किलो वजनासह कांस्यपदकावर समाधान मानावे लागले.
याआधी स्नॅच (८१ किलो), क्लीन अँड जर्क (१०४ किलो) आणि एकूण (१८५ किलो) मधील विक्रम आंध्रप्रदेशच्या सी.एच. श्रीलक्ष्मी हिच्या नावावर होता.
नेमबाजीत तेलंगणाच्या युवेक बत्तुला आणि व्यंकट लक्कू यांनी मिश्र सांघिक गटात सुवर्ण आणि मध्य प्रदेशच्या वंशिका तिवारी आणि उदयमान राठोड यांनी रौप्य व पंजाबच्या जोरावर बेदी आणि रिशम गुरॉन यांनी कांस्यपदक मिळवले.
महत्वाच्या बातम्या –
खेलो इंडिया युवा क्रीडा स्पर्धा । महाराष्ट्राच्या सुवर्णपदकांची गोल्डन जुबली
41व्या वरिष्ठ व 25व्या खुल्या राष्ट्रीय रोईंग स्पर्धेत सर्व्हिसेस स्पोर्टस कंट्रोल बोर्ड संघाची आगेकूच
