पाकिस्तानची टी-२० लीग ‘पीएसएल’ (PSL) समोरील अडचणी दिवसेंदिवस वाढतच आहेत. पाकिस्तान क्रिकेट बोर्डाचे (PCB) अध्यक्ष मोहसीन नकवी यांनी रविवारी २२ मार्च रोजी जाहीर केले की, पीएसएल २०२६ चे आयोजन आता फक्त दोनच ठिकाणी केले जाईल, तर यापूर्वी सहा ठिकाणे निश्चित करण्यात आली होती. पश्चिम आशियात सुरू असलेल्या युद्धामुळे निर्माण झालेल्या पेट्रोलियम संकटामुळे हा निर्णय घेण्यात आला आहे. आता एका ‘पीटीआय’ (PTI) रिपोर्टमध्ये असा दावा करण्यात आला आहे की, पीएसएलमध्ये सहभागी होणारे काही खेळाडू पाकिस्तानात खेळण्यासाठी त्यांच्या करारात ठरलेल्या रकमेपेक्षा जास्त पैशांची मागणी करत आहेत, कारण तिथली सुरक्षा व्यवस्था समाधानकारक नाही.
पीसीबीच्या या लीगवर पेट्रोलियम संकटाव्यतिरिक्त दुसरे एक मोठे संकटही घोंघावत आहे. अफगाणिस्तानसोबत पाकिस्तानच्या वाढत्या तणावामुळे आणि ‘थेट युद्धा’सारख्या परिस्थितीमुळे प्रकरण अधिक बिघडत चालले आहे. या कारणामुळे परदेशी खेळाडूंच्या सुरक्षेबाबतची चिंता वाढली आहे. अनेक परदेशी खेळाडू पीएसएल सोडून इंडियन प्रीमियर लीग (IPL) मध्ये खेळण्यासाठी प्राधान्य देत आहेत. यामुळेच पाकिस्तान सुपर लीगमध्ये उतरण्यापूर्वी काही खेळाडूंनी ठरलेल्या करारापेक्षा अधिक पैशांची मागणी केली आहे. पीटीआयने सूत्रांच्या हवाल्याने म्हटले आहे की, “पीसीबी सध्या पीएसएल ठरलेल्या वेळेत आयोजित करण्यावर पूर्ण लक्ष केंद्रित करत आहे. ज्या परदेशी खेळाडूंनी वैयक्तिक कारणास्तव लीग सोडली आहे किंवा उघडपणे कराराचे उल्लंघन करून आयपीएलमध्ये खेळायला गेले आहेत, त्यांच्यावर अद्याप कोणतीही कारवाई निश्चित केलेली नाही.”
पीसीबीचे अध्यक्ष मोहसीन नकवी यांनी सांगितले की, करारातील अटींचे उल्लंघन करणाऱ्या खेळाडूंवर ते कायदेशीर कारवाई करतील, परंतु हा काही सोपा मार्ग नाही. समोर आलेल्या एका रिपोर्टनुसार, खेळाडूंच्या कराराचा सन्मान राखला जावा यासाठी एक मजबूत आराखडा तयार करण्यासाठी पीसीबी ‘आंतरराष्ट्रीय क्रिकेट परिषद’ (ICC) कडे धाव घेऊ शकते. आता दोन खाजगी संस्थांमधील या वादात आयसीसी काय आणि कसा निर्णय घेते, हे पाहणे महत्त्वाचे ठरेल.
