मुंबई। अवैस खानच्या नाबाद शतकाच्या जोरावर रिझवी स्प्रिंगफिल्ड हायस्कूल संघाने मुंबई इंडियन्स ज्युनियर आंतरशालेय क्रिकेट स्पर्धेत मुंबई टप्प्यातील १४ वर्षांखालील मुलांच्या गटात उपांत्य फेरीत प्रेवश केला. रिझवी स्प्रिंगफिल्ड संघाने उपांत्यपूर्व फेरीच्या लढतीत डॉन बॉस्को हायस्कूलवर ९९ धावांनी विजय मिळवला. उपांत्यपूर्व फेरीच्या अन्य लढतीत अल बरकत मलिक इंग्लिश स्कूल, स्वामी विवेकानंद इंटरनॅशनल स्कूल ( कांदिवली ) आणि आयईएस न्यू इंग्लिश स्कूल ( वांद्रे) या संघांनी विजय मिळवले.
प्रथम फलंदाजी करताना रिझवी स्प्रिंगफिल्ड हायस्कूल संघाने ४० षटकांत ६ बाद २१८ धावा केल्या. अवैस खानने १०५ चेंडूंत नाबाद १०३ धावांची महत्त्वपूर्ण खेळी केली. त्याला हर्ष घार्सनने ४६ धावा करून योग्य साथ दिली. लक्ष्याचा पाठलाग करताना डॉन बॉस्को हायस्कूल ( माटुंगा) संघाचे सर्व फलंदाज ३६.४ षटकांत ११९ धावांत माघारी परतले आणि रिझवी संघानं ९९ धावांनी विजय मिळवला. अवैसने १ विकेट घेत अष्टपैलू चमक दाखवली.
अल बरकत मलिक इंग्लिश स्कूल संघाने ४० षटकांत सर्वबाद २०४ धावा केल्या. आर्यन शेजुळेचे ( ९४ धावा) शतक अवघ्या ६ धावांनी हुकले. प्रतिस्पर्धी केसी गांधी इंग्लिश स्कूल संघाला ३८.१ षटकांत १५३ धावांवर गुंडाळुन अल बरकत संघाने ५१ धावांनी विजयी साजरा केला. आर्यनला ( ९४ धावा आणि १ विकेट) सामनावीर म्हणून गौरविण्यात आले.
अन्य लढतींत स्वामी विवेकानंद इंटरनॅशनल स्कूल ( कांदिवली ) आणि आयईएस न्यू इंग्लिश स्कूल ( वांद्रे) या संघांनी अनुक्रमे सेंट मेरी हायस्कूल ( १३४ धावांनी विजयी) आणि स्वामी विवेकानंद इंटरनॅशनल स्कूल ( ७३ धावांनी विजयी) यांचा पराभव केला.
संक्षिप्त धावफलक
१४ वर्षांखालील मुले ( उपांत्यपूर्व फेरी )
रिझवी स्प्रिंगफिल्ड हायस्कूल ४० षटकांत ६ बाद २१८ धावा ( अवैस खान १०३*, हर्ष घार्सन ४६) वि. वि. डॉन बॉस्को हायस्कूल ( माटुंगा) ३६.४ षटकांत सर्वबाद ११९ धावा, ९९ धावांनी विजयी; सामनावीर – अवैस खान ( १०५ चेंडूंत नाबाद १०३ धावा आणि १ विकेट)
अल बरकत मलिक इंग्लिश स्कूल ४० षटकांत सर्वबाद २०४ ( आर्यन शेजुळे ९४, यासीन शेश २६) वि. वि. केसी गांधी इंग्लिश स्कूल ( कल्याण) ३८.१ षटकांत सर्वबाद १५३ धावा, ५१ धावांनी विजयी; सामनावीर – आर्यन शेजुळे ( १०७ चेंडूंत ९४ धावा आणि १ विकेट)
स्वामी विवेकानंद इंटरनॅशनल स्कूल ( कांदिवली ) ४० षटकांत ९ बाद २१३ ( यथार्थ यादव ७३, शौर्य शरण ३८ ) वि. वि. सेंट मेरी हायस्कूल ३०.३ षटकांत सर्वबाद ७९ धावा, १३४ धावांनी विजयी; सामनावीर – यथार्थ यादव ( ७३ धावा आणि ३ विकेट्स)
आयईएस न्यू इंग्लिश स्कूल ( वांद्रे) ४० षटकांत ६ बाद २०९ ( आरुष पाटणकर ४१, अर्जुन बागायतकर ३४) वि. वि. स्वामी विवेकानंद इंटरनॅशनल स्कूल ( बोरीवली) ३२.४ षटकांत सर्वबाद १३६ धावा, ७३ धावांनी विजयी; सामनावीर – हृषिकेश गोरे ( नाबाद ३० धावा आणि १ विकेट)