न्यूझीलंड दौऱ्यातील भारतीय संघाचा विजयीरथ अखेर थांबला. शुक्रवारी (३० ऑक्टोबर) ऑकलंड येथील इडन पार्कवर न्यूझीलंड आणि भारत यांच्यात मालिकेतील चौथा टी२० सामना खेळला गेला, जो भारताने तब्बल ८७ धावांनी गमावला. या सामन्यात भारताच्या एका गोलंदाजाला किवी फलंदाजांनी चांगलेच धुतले, ज्यामुळे त्याच्या नावावर नकोश्या विक्रमाची नोंद झाली. वेगवान गोलंदाज नितीश कुमार रेड्डी एकाच षटकात सर्वाधिक धावा करणाऱ्या भारतीय खेळाडूंमध्ये सामील झाला आहे.
चौथ्या सामन्यादरम्यान नितीशने एकाच षटकात ३२ धावा दिल्या. भारतीय कर्णधार श्रेयस अय्यरने या सामन्यात नाणेफेक जिंकून गोलंदाजी करण्याचा निर्णय घेतला होता. त्याने नितीशला १६ वे षटक दिले आणि भारतीय गोलंदाजाची चांगलीच धुलाई झाली.
त्या षटकातील पहिल्या चेंडूवर मायकल ब्रेसवेलने एकेरी धाव घेतली आणि स्फोटक फलंदाजी ग्लेन फिलिप्स क्रिजवर आला, ज्याने दुसऱ्या चेंडूवर चौकार मारला, जो नो-बॉल होता. त्यामुळे नितीशने पुन्हा चो चेंडू टाकला असता फिलिप्सने दुहेरी धाव घेतली आणि नंतर सलग चार षटकार मारले. यामुळे त्याने त्या एका षटकात एकूण ३२ धावा दिल्या आणि तो एकाच टी२० आंतरराष्ट्रीय षटकात सर्वाधिक धावा देणारा संयुक्तपणे दुसरा भारतीय गोलंदाज ठरला.
भारतीय खेळाडूंमध्ये टी२० आंतरराष्ट्रीय सामन्याच्या एकाच षटकात सर्वाधिक धावा देण्याचा विक्रम शिवम दुबेच्या नावावर आहे. त्याने २०२० मध्ये न्यूझीलंडविरुद्ध एका षटकात ३४ धावा दिल्या होत्या.
१० वर्षांच्या इतिहासाची पुनरावृत्ती…
दहा वर्षांपूर्वी, २०१६ मध्ये भारताचा वेगवान गोलंदाज स्टुअर्ट बिन्नीने वेस्ट इंडिजविरुद्धच्या टी२० सामन्यातील एका षटकात ३२ धावा दिल्या होत्या. नितीशने आज (शुक्रवारी, ३० ऑक्टोबर, २०२६) तेवढ्याच धावा देत त्या कामगिरीची पुनरावृत्ती केली आहे.
नितीशने या सामन्यात चार षटकांत १६ च्या इकॉनॉमी रेटने ६४ धावा दिल्या आणि एक विकेट घेतली.
भारतीय गोलंदाजाद्वारे एका षटकात दिलेल्या सर्वाधिक धावा (T20I)
३४ – शिवम दुबे वि. न्यूझीलंड, माऊंट माउंगानुई, २०२०
३२ – स्टुअर्ट बिन्नी वि. वेस्ट इंडिज, लॉडरहिल, २०१६
३२ – नितीश रेड्डी वि. न्यूझीलंड, ऑकलंड, २०२६
२९ – रवी बिश्नोई वि. इंग्लंड, मँचेस्टर, २०२६
या सामन्यात न्यूझीलंडने ग्लेन फिलिप्सच्या शतकी खेळीच्या जोरावर २० षटकांत ७ विकेट्स गमावून २५९ धावा केल्या. प्रत्युत्तरात भारत २० षटकांत ९ विकेट्स गमावून १७२ धावसंख्येपर्यंतच मजल मारू शकला. या मालिकेतील पाचवा सामना १ नोव्हेंबर रोजी हॅमिल्टन येथे खेळला जाणार आहे. चौथ्या सामन्यानंतर पाच सामन्यांची ही टी२० मालिका ३-१ अशी आहे. (Nitish Kumar conceded 32 runs in 1 over during NZ vs IND 4th T20I repeating a piece of history from 10 years ago)
