पंजाब किंग्जचा अष्टपैलू खेळाडू ग्लेन मॅक्सवेलला भारतीय क्रिकेट नियामक मंडळाने (BCCI) दंड ठोठावला आहे. ग्लेन मॅक्सवेलच्या मॅच फीच्या 25 टक्के रक्कम कापण्यात आली आहे. आयपीएल 2025 च्या चेन्नई सुपर किंग्ज विरुद्धच्या 22व्या लीग सामन्यात मॅक्सवेलने आयपीएल आचारसंहितेचे उल्लंघन केले. यासाठी त्याला कठोर शिक्षा झाली आहे. सामन्यादरम्यान शिवीगाळ आणि तोडफोड केल्यामुळे त्याला आयपीएल मॅच रेफरीने ही शिक्षा दिली आहे. तथापि, ग्लेन मॅक्सवेलने असे कृत्य कधी केले, ज्यासाठी त्याला मोठा दंड ठोठावण्यात आला हे अद्याप स्पष्ट झालेले नाही.
आयपीएलने जारी केलेल्या मीडिया रिलीजमध्ये असे सांगण्यात आले की, पंजाब किंग्जचा अष्टपैलू खेळाडू ग्लेन मॅक्सवेलला मंगळवारी न्यू चंदीगडमधील न्यू पीसीए स्टेडियमवर चेन्नई सुपर किंग्ज विरुद्धच्या त्याच्या संघाच्या सामन्यादरम्यान आयपीएल आचारसंहितेचे उल्लंघन केल्याबद्दल त्याच्या मॅच फीच्या 25 टक्के दंड ठोठावण्यात आला आहे आणि त्याच्या खात्यात एक डिमेरिट पॉइंट देखील जोडण्यात आला आहे. या सामन्याबद्दल बोलायचे झाले तर, ग्लेन मॅक्सवेलने पंजाब किंग्जच्या विजयात बॅटने योगदान दिले नाही, कारण तो एक धाव घेत बाद झाला होता, परंतु चेंडूने विकेट घेण्यात तो यशस्वी झाला. या हंगामात तो आतापर्यंत अपयशी ठरला आहे.
त्याच मीडिया रिलीझमध्ये पुढे म्हटले आहे की ग्लेन मॅक्सवेलने आयपीएल आचारसंहितेच्या कलम 2.2 अंतर्गत लेव्हल 1चा गुन्हा (सामनादरम्यान अपशब्द वापरणे आणि क्रिकेट उपकरणांचे किंवा स्टेडियमचे नुकसान करणे) कबूल केला आणि मॅच रेफरीची शिक्षा स्वीकारली. आचारसंहितेच्या लेव्हल 1च्या उल्लंघनासाठी, सामनाधिकाऱ्यांचा निर्णय अंतिम आणि बंधनकारक असतो. ग्लेन मॅक्सवेलने कदाचित हे केले असेल जेव्हा तो गरज असताना संघासाठी धावा करू शकला नाही आणि अश्विनने त्याला बाद केले.
