क्रिकेटमध्ये पहिला चेंडू खेळणे ही मोठी कठीण गोष्ट मानली जाते. त्यातही तो प्रकार जर कसोटी असेल, तर भलेभले क्रिकटर अडखळतात. बऱ्याच वेळा अनेक क्रिकेटपटू हे मोठा अनुभव आल्यानंतर सलामीला आलेले पाहिले आहे.
कारकिर्दीतील पहिलाच सामना खेळताना क्रिकेटर शक्यतो पहिला चेंडू खेळताना फारसे दिसत नाहीत. परंतु काही असे क्रिकेटर आहेत, ज्यांनी अतिशय़ कमी वयात कारकिर्दीतील पहिलाच चेंडू हा सलामीला खेळला आहे व तो देखील सामन्यातील पहिलाच चेंडू होता.
भारत विरुद्ध विंडीज यांच्यात राजकोट येथे झालेल्या पहिल्या कसोटी सामन्यात भारताने नाणेफेक जिंकत प्रथम फलंदाजीचा निर्णय घेतला होता. भारताकडून या सामन्यात १८ वर्ष ३२९ दिवस वय असलेल्या पृथ्वी शाॅने कसोटी पदार्पण केले होते.
तसेच प्रथेप्रमाणे पदार्पणाच्या सामन्यात जर खेळाडू सलामीवीर असेल तर सिनीयर खेळाडू पहिला चेंडू खेळतो. परंतु या सामन्यात पृथ्वीनेच पहिला चेंडू खेळला होता.
यामुळे त्याच्या नावावर एक खास विक्रम जमा झाला. सर्वात कमी वयात कसोटी सामन्यातील पहिला चेंडू खेळणारा तो चौथा तरुण खेळाडू ठरला ठरला होता.
त्याने १८ वर्ष आणि ३२९ दिवसांचा असताना हा कारनामा केला आहे. पृथ्वीपेक्षा कमी वयाचे असताना हॅमिल्टन मसकाझा, तमीम इक्बाल आणि इम्रान फरहातने कसोटी सामन्यातील पहिला चेंडू खेळला आहे.
याचबरोबर भारताकडून कसोटीत सलामीला फलंदाजीला येणारा शॉ दुसरा सर्वात तरुण खेळाडू ठरला होता. यापुर्वी विजय मेहरा यांनी १७ वर्ष आणि २५७ दिवसांचे असताना सलामीला फलंदाजी केली होती परंतु त्या सामन्यातील पहिला चेंडू विनु मंकड खेळले होते.
