‘तुम्हालाच पाहून खूप गोष्टी शिकलो आहे,’ दिग्गज यष्टीक्षरकाच्या प्रशंसेनंतर पंतची मोठी प्रतिक्रिया

भारत विरुद्ध इंग्लंड यांच्यात अहमदाबादच्या नरेंद्र मोदी स्टेडियमवर सुरू असलेल्या चौथ्या कसोटी सामन्याचा दुसरा दिवस रिषभ पंतच्या नावावर झाला. या दिवशी भारताकडून पहिल्या डावात पंतने शतक झळकावले. हे शतक त्याच्या कारकिर्दीतील केवळ तिसरे शतक आहे. या शतकासोबतच पंतने दिग्गज यष्टीरक्षक ऍडम गिलख्रिस्टच्या मोठ्या विक्रमाची बरोबरी केली. त्यानंतर गिलख्रिस्टने ट्विटरद्वारे पंतचे कौतुक केले. आता पंतने आपले कौतुक केल्याबद्दल त्यांचे आभार व्यक्त केले आहेत.

माजी ऑस्ट्रेलियन दिग्गज गिलख्रिस्ट यांनी लिहिले होते की, ‘तू किती गोष्टी साध्य करतोस हे जास्त महत्त्वाचे नाही; तर तू कोणत्या वेळी या गोष्टी साध्य करतोस हे महत्त्वाचे आहे. आपल्या संघाला जेव्हा जास्त गरज असते, तेव्हा तुम्ही तुमचे उत्कृष्ट देत असाल तरच तुम्ही खऱ्या अर्थाने मॅच विनर असता.’

गिलख्रिस्टच्या या ट्विटवर प्रतिक्रिया देताना पंतने म्हटले की, ‘तुम्ही माझ्याबद्दल असे म्हणणे माझ्यासाठी खूप मोठी गोष्ट आहे. मागील काही वर्षात तुम्हाला पाहून मी खूप काही शिकलो आहे.’

Huge compliment coming from you, Gilly! Learned a lot watching you over the years. https://t.co/H5XIQl3XMe

— Rishabh Pant (@RishabhPant17) March 5, 2021