भारत आणि वेस्ट इंडिज या दोन्ही संघांमध्ये ३ टी२० सामन्यांची मालिका सुरू आहे. या मालिकेतील पहिला सामना बुधवारी (१६ फेब्रुवारी) कोलकाताच्या ईडन गार्डन मैदानावर पार पडला. या सामन्यात भारतीय संघाने अप्रतिम कामगिरी करत ६ गडी राखून वि जय मिळवला आहे. तरीदेखील भारतीय कर्णधार रोहित शर्मा फलंदाजांच्या कामगिरीवर निराश असल्याचे पाहायला मिळाले आहे.
हा सामना झाल्यानंतर रोहित शर्माने म्हटले की, “हा सामना लवकर संपायला हवा होता. सामन्यात विजय मिळवल्याचा आनंद आहे, या सामन्यामुळे आमचा आत्मविश्वास वाढेल. खरतर गोलंदाजांनी वेस्ट इंडिजच्या फलंदाजांना मोठी धावसंख्या उभारण्यापासून रोखले. आमची फलंदाजी हवी तशी झाली नाही. आम्ही यातून खूप काही शिकू शकतो.”
रोहित शर्माने रवी बिश्नोईचे कौतुक करत म्हटले की, “बिश्नोई हा प्रतिभावान खेळाडू आहे, त्यामुळे आम्ही त्याला थेट भारतीय संघात स्थान दिले आहे. आम्ही त्यात काहीतरी वेगळं पाहत आहोत. त्याच्याकडे भरपूर विविधता आणि कौशल्य आहे. तो कुठल्याही स्तरावर गोलंदाजी करू शकतो. त्याच्या गोलंदाजीमुळे आम्हाला इतर गोलंदाजांना फिरवण्याचे पर्याय मिळत असतात. त्याचे भविष्य उज्ज्वल आहे आणि आता त्याचा वापर कसा करायचा हे आमच्यावर अवलंबून आहे.”
तसेच ईशान किशनच्या फलंदाजीबद्दल बोलताना रोहित शर्मा म्हणाला की, “तो (ईशान किशन) मुंबई इंडियन्स संघासाठी मध्यक्रमात खेळणार आहे. ही त्याची फलंदाजी पोजिशन नाहीये. पण आम्हाला खात्री करून घ्यायची आहे की आम्ही त्याला आत्मविश्वास देऊ शकतो जो त्याला पुढे जाण्यास मदत करेल.”
तसेच या सामन्याबद्दल बोलायचं झालं तर भारतीय संघाने नाणेफेक जिंकून प्रथम गोलंदाजी करण्याचा निर्णय घेतला होता. वेस्ट इंडिज संघाकडून प्रथम फलंदाजी करताना निकोलस पुरनने सर्वाधिक ६१ धावांची खेळी केली होती. या खेळीच्या जोरावर वेस्ट इंडिज संघाला २० षटक अखेर ७ बाद १५७ धावा करण्यात यश आले होते. या धावांचा पाठलाग करताना भारतीय संघाकडून रोहित शर्माने सर्वाधिक ४० धावांची खेळी केली. तर ईशान किशनने ३५ धावांचे योगदान दिले. या खेळीच्या जोरावर भारतीय संघाने ६ गडी राखून विजय मिळवला.
महत्वाच्या बातम्या:
आयपीएल २०२२ मध्ये अशा असू शकतात सर्व १० फ्रँचायझींच्या सलामी जोड्या, पाहा संपूर्ण यादी
आयपीएल २०२२ मध्ये अशा असू शकतात सर्व १० फ्रँचायझींच्या सलामी जोड्या, पाहा संपूर्ण यादी