पाकिस्तानला नुकतेच बांगलादेशविरुद्धच्या एकदिवसीय मालिकेत २-१ ने पराभवाचा सामना करावा लागला. दरम्यान, मालिकेतील दुसऱ्या सामन्यात सलमान अली आगाच्या धावबाद (Run-out) होण्यावरून मोठा गदारोळ झाला होता. या वादग्रस्त घटनेने क्रिकेट जगतात चर्चेला उधाण आले. सलमान आगाला धावबाद करण्याची पद्धत योग्य नव्हती, असे अनेकांचे मत होते. यावर आता क्रिकेटचे नियम बनवणाऱ्या मेरीलेबोन क्रिकेट क्लबने (MCC) आपली प्रतिक्रिया देत मोठा निकाल सुनावला आहे.
ही घटना पाकिस्तानच्या डावातील ३९ व्या षटकात घडली, जेव्हा मोहम्मद रिझवान स्ट्राईकवर होता आणि बांगलादेशचा कर्णधार मेहदी हसन मिराज गोलंदाजी करत होता. षटकाच्या चौथ्या चेंडूवर रिझवानने समोरच्या दिशेने शॉट मारला, जो रोखण्यासाठी हसन मिराज पुढे आला. यादरम्यान नॉन-स्ट्रायकर एंडला उभा असलेल्या सलमान अली आगाशी त्याची धडक झाली. धडक झाल्यानंतर आगा खाली वाकून चेंडू उचलण्याचा प्रयत्न करू लागला, बहुधा चेंडू ‘डेड’ झाला आहे असे समजून त्याने हे केले.
परंतु, त्याच वेळी मिराजने वेगाने चेंडू उचलून स्टंपवर मारला, तर आगा क्रीजच्या बाहेर उभा होता. बांगलादेशच्या खेळाडूंनी अपील केले आणि प्रकरण तिसऱ्या पंचांकडे (Third Umpire) गेले, जिथे त्याला धावबाद घोषित करण्यात आले. सलमान आगा या निर्णयावर प्रचंड नाराज दिसला आणि रागाच्या भरात पॅव्हेलियनमध्ये परतताना त्याने आपले हेल्मेट आणि ग्लोव्हज जमिनीवर फेकून दिले.
या घटनेवर MCC ने एक निवेदन प्रसिद्ध करून स्पष्ट केले की, पंचांचा निर्णय नियमांनुसार पूर्णपणे योग्य होता. नियमांनुसार, दोन्ही पंचांकडे वेगळे काही करण्याची संधी नव्हती. त्यांच्या मते, त्या वेळी चेंडू ‘डेड’ झाला नव्हता आणि फलंदाज क्रीजच्या बाहेर होता, त्यामुळे त्याला बाद देणे हाच योग्य निर्णय होता. MCC ने असेही नमूद केले की, जर आगाने चेंडूला स्पर्श केला असता किंवा तो उचलला असता, तर त्याला ‘ऑब्स्ट्रक्टिंग द फील्ड’ (क्षेत्ररक्षणात अडथळा) अंतर्गत देखील बाद दिले जाऊ शकले असते.
धडक झाल्यानंतर चेंडू ‘डेड बॉल’ घोषित करायला हवा होता, असा युक्तिवाद अनेकांनी केला. मात्र, MCC ने हा तर्क फेटाळून लावला. खेळाडूंच्या धडकेमुळे चेंडू आपोआप डेड होत नाही, असे त्यांचे म्हणणे होते. जर असा नियम बनवला, तर खेळाडू त्याचा चुकीचा फायदा घेऊ शकतात. इतकेच नाही तर, भविष्यात येणाऱ्या नवीन नियमांमध्येही अशा परिस्थितीत चेंडू डेड मानला जाणार नाही.
MCC ने नियमांच्या आधारे या निर्णयाचे समर्थन केले, परंतु ‘स्पिरिट ऑफ क्रिकेट’चा (खिलाडूवृत्ती) मुद्दाही उपस्थित केला. त्यांच्या मते, बांगलादेश संघाने इच्छा असती तर अपील मागे घेऊ शकले असते, कारण ती धडक अनावधानाने झाली होती आणि आगाला वाटले होते की चेंडू डेड झाला आहे. सामन्यानंतर स्वतः सलमान आगानेही म्हटले की, जर तो क्षेत्ररक्षण करणाऱ्या संघात असता, तर त्याने खिलाडूवृत्ती दाखवली असती.
