घटस्फोटानंतर धवनची व्हिडिओ कॉलद्वारे मुलासोबत दंगामस्ती, पाहा बाप-लेकातील प्रेमळ क्षण

भारतीय क्रिकेट संघाचा धाकड सलामीवीर शिखर धवन हा सध्या इतर खेळाडूंप्रमाणे इंडियन प्रीमियर लीग २०२१ साठी संयुक्त अरब अमिरातीमध्ये आहे. तिथे तो दिल्ली कॅपिटल्स संघाला पहिलेवहिले जेतेपद मिळवून देण्यासाठी कसून सराव करतो आहे. तत्पूर्वी तो पत्नी आयेशा मुखर्जी हिच्यासोबत घटस्फोट झाल्यानंतर चर्चेत आला होता. आयेशाने इंस्टाग्राम पोस्टद्वारे घटस्फोटाची माहिती दिली होती, परंतु धवन अजून उघडपणे यावर बोललेला नाही. आता धवनने त्याचा मुलगा जोरावरसोबत व्हिडिओ कॉलवर संवाद साधला आहे.

धवन नेहमीच आपल्या ७ वर्षीय मुलासोबत मजा-मस्ती करत असतो. यादरम्यानचे फोटोही तो सोशल मीडियावर शेअर करत असतो. युएईतून मुलगा जोरावरसोबत व्हिडिओ कॉलद्वारे संवाद साधल्याचा फोटोही त्याने इंस्टाग्राम स्टोरीमध्ये शेअर केला आहे. या फोटोमध्ये वडील आणि मुलाची ही जोडी एकमेकांना किस करताना दिसत आहे.

धवनने हा फोटो शेअर करत कॅप्शनमध्ये लिहिले आहे की, ‘माझ्या दिवसाचा सर्वात खास भाग.’ या फोटोवरुन त्यांच्यातील प्रेम स्पष्टपणे दिसून येते.

दुर्दैवाची बाब म्हणजे, भारतीय संघाच्या सर्वोत्कृष्ट सलामीवीरांपैकी एक असलेल्या धवनला टी२० विश्वचषकासाठी संधी मिळाली नाही. कदाचित याचीच निराशा व्यक्त करण्यासाठी त्याने आपला हसतानाचा एक फोटो पोस्ट करत लिहिले होते की, ‘हसत राहिले पाहिजे. हसणे हीच आपली सर्वात मोठी ताकद असते.’