पुणे। महाराष्ट्र राज्य लॉन टेनिस संघटना(एमएसएलटीए) यांच्या वतीने आयोजित तिसऱ्या टाटा ओपन महाराष्ट्र टेनिस स्पर्धेत जर्मनीच्या सेड्रिक-मार्सेल स्टीबने गतवर्षीच्या उपविजेत्या क्रोएशियाच्या इवो कार्लोविच याचा 6-3, 6-4 असा पराभव केला.
म्हाळुंगे बालेवाडी येथील श्री शिवछत्रपती क्रीडा संकुलातील टेनिस कोर्टवर सुरु असलेल्या या स्पर्धेत पहिल्या फेरीत 1 तास 5 मिनिट चालेल्या सामन्यात जर्मनीच्या सेड्रिक-मार्सेल स्टीबने गेल्या वर्षीच्या उपविजेत्या जागतीक क्रमांक 121 क्रोएशियाच्या 40 वर्षीय इवो कार्लोविचचा 6-3, 6-4 असा पराभव करून दुस-या फेरीत प्रवेश केला. जागतीक क्रमांक 149 असलेल्या 29 वर्षिय सेड्रिकने सामन्याच्या सुरूवातीपासूनच आक्रमक पवित्रा घेत पहिल्या सेटच्या पाचव्या गेमअंती 3-2 अशी आघाडी घेतली.
सहाव्या गेममध्ये सेड्रिकने इव्होची सर्व्हिस ब्रेक करत 4-2 अशी आघाडी घेत इव्होवर दबाव निर्माण केला. पहिल्या सेटच्या नवव्या गेमपर्यंत सेड्रिकने सामन्यावरतलीआपली पकड पक्की ठेवत पहिला सेट 6-3 असा जिंकला. दुस-या सेटमध्ये चौथ्या गेमअंती सामना 2-2 अशा बरोबरीत असताना सेड्रिकने पाचव्या गेममध्ये इव्होची सर्व्हिस ब्रेक करत 3-2 अशी आघाडी घेतली. सहाव्या, आठव्या व दहाव्या गेममध्ये स्वतःची सर्व्हिस राखत सेड्रिकने दुसरा सेट 6-4 असा जिंकला व सामना 6-3, 6-4 असा जिंकत दुस-या फेरीत प्रवेश केला.
दुस-या सामन्यात जपानच्या पाचव्या मानांकीत यूची सुगीताने इटलीच्या थॉमस फॅबियानोचा 6-3, 6-0 असा एकतर्फी लढतीत पराभव करत दुस-या फेरीत प्रवेश केला. 1 तास 13 मिनिट चाललेल्या सामन्यात जागतीक क्रमांक 86 असलेल्या 31 वर्षीय यूची सुगीताने पहिल्या सेटच्या पहिल्या गेमपासूनच आक्रमक खेळाचे प्रदर्शन केले. पहिल्या गेममध्ये स्वतःची सर्व्हिस राखली व दुस-या गेममध्ये थॉमसची सर्व्हिस ब्रेक करत 2-0 अशी आघाडी घेतली. तिस-या गेममध्ये स्वतःची सर्व्हिस राखत पुन्हा चौथ्या गेममध्ये थॉमसची सर्व्हिस ब्रेक करत 4-0 अशी आघाडी घेत थॉमसवर दबाव निर्माण केला.
पाचव्या गेममध्ये थॉमसने यूचीची सर्व्हिस ब्रेक केली व सामना 4-1 झाला. पुढे सातव्या व नवव्या गेममध्ये यूची सुगीताने आपली सर्व्हिस राखत 6-3असा सेट जिंकत सामन्यात आघाडी घातली. दुस-या सेटमध्ये यूची सुगीताने थॉमसच्या सर्व तीन सर्व्हिस ब्रेक करत दुसरा सेट 6-0 असा सहज जिंकला व सामना 6-3, 6-0असा जिंकून स्पर्धेत आगेकुच केली.
दुहेरी गटत पहिली फेरीत इटलीच्या स्टीफानो ट्रॅवाग्लिया व पाओलो लोरेन्झी या जोडीने रशियाच्या इव्हगेनी डॉन्स्कोय व लिथुआनियाच्या रिकार्डस बेरनकीस यांचा 6-3, 6-4 असा पराभव करत स्पर्धेत आगेकुच केली.
एकेरी गट- पहिली फेरी
सेड्रिक-मार्सेल स्टीब (जर्मनी) वि वि इवो कार्लोविच (क्रोएशिया) 6-3, 6-4
यूची सुगीता (जपान)(5) वि वि थॉमस फॅबियानो (इटली) 6-3, 6-०
दुहेरी गट- पहिली फेरी
स्टीफानो ट्रॅवाग्लिया (इटली) / पाओलो लोरेन्झी (इटली) वि वि इव्हगेनी डॉन्स्कोय (रशिया) / रिकार्डस बेरनकीस (लिथुआनिया) 6-3, 6-4