इंग्लंड आणि वेल्स क्रिकेट बोर्डाने (ECB) गुरूवारी (30 जुलै) स्टीफन फ्लेमिंग यांची पुरुष कसोटी संघाच्या मुख्य प्रशिक्षकपदी नियुक्ती केली आहे. तसेच कर्णधार म्हणून जो रूट याला नेमले आहे.
चेन्नई सुपर किंग्जसोबतच्या 18 वर्षांच्या सहवासानंतर आणि 111 सामन्यांच्या खेळाडू कारकिर्दीत न्यूझीलंडचे सर्वात यशस्वी कसोटी कर्णधार बनल्यानंतर, फ्लेमिंग हे जागतिक क्रिकेटमधील सर्वात यशस्वी प्रशिक्षकांपैकी एक आहेत. तसेच ते पहिल्यांदाच एखाद्या आतंरराष्ट्रीय संघाचे मुख्य प्रशिक्षकपद सांभाळणार आहेत.
फ्लेमिंग यांच्या मार्गदर्शनाखाली सीएसकेने विक्रमी पाच इंडियन प्रीमियर लीग विजेतेपदे जिंकली. तसेच संघ दहा वेळा अंतिम फेरीत पोहोचला. फ्लेमिंग यांनी 2023 मध्ये सदर्न ब्रेव्हला ‘द हंड्रेड’ पुरुष स्पर्धेच्या अंतिम फेरीतही पोहोचवले होते, तसेच त्यांनी दक्षिण आफ्रिका आणि अमेरिकेतील सीएसकेच्या संलग्न संघांना आणि मेलबर्न स्टार्सलाही प्रशिक्षण दिले आहे.
मुख्य प्रशिक्षकपदी नियुक्ती झाल्याबद्दल स्टीफन फ्लेमिंग म्हणाले, “इंग्लंड संघात कसोटी प्रशिक्षक म्हणून सामील होताना मला प्रचंड आनंद होत आहे. हे जागतिक क्रिकेटमधील सर्वात प्रतिष्ठित प्रशिक्षक पदांपैकी एक आहे आणि या पदावर नियुक्ती झाल्याबद्दल मी सन्मानित झालो आहे.”
फ्लेमिंग यांच्या नियुक्तीबरोबर इंग्लंड क्रिकेटने जो रूटची नवा कसोटी संघाचा कर्णधार म्हणून निवड केली आहे.
रूटच्या नेतृत्वाखाली इंग्लंडची कसोटी कामगिरी उत्तम राहिली आहे. संघाचे सर्वाधिक कसोटी सामन्यांमध्ये (65 कसोटी) तसेच सर्वाधिक विजयांमध्ये (27 विजय) कर्णधारपद भूषवण्याचा विक्रम रूटच्याच नावावर आहे. त्याचा कसोटी कर्णधार म्हणून पहिला कार्यकाळ 2017-2022 पर्यंत होता. त्यानंतर त्याने नुकत्याच घरच्या मैदानावर न्यूझीलंडविरुद्धच्या ओव्हल कसोटीमध्ये संघाचे नेतृत्व केले होते.
इंग्लंड कसोटी संघाचा कर्णधार रूट म्हणाला, “पुन्हा एकदा इंग्लंड पुरुष कसोटी संघाचा कर्णधार होण्याची संधी मिळणे हा माझ्यासाठी मोठा सन्मान आणि सौभाग्य आहे. कसोटी कर्णधारपद हे एक कठीण पण अत्यंत समाधान देणारे काम आहे आणि गेल्या महिन्यात (ब्रेंडन) मॅक्युलमसोबत काम करताना त्याचा पुन्हा एकदा थोडा अनुभव घेतल्यानंतर, खेळाडूंच्या या पुढच्या पिढीला पुढे नेण्यासाठी मी उत्सुक आहे.”
इंग्लंडने मागील महिन्यात घरच्या मैदानावर खेळलेली न्यूझीलंडविरुद्धची तीन सामन्यांची कसोटी मालिका 1-2 अशी गमावली. तेव्हा संघाचे मुख्य प्रशिक्षक मॅक्युलम तर कर्णधार बेन स्टोक्स होता. मॅक्युलमने निराशाजनक कामगिरीनंतर पदत्याग केला, तर स्टोक्सने आंतरराष्ट्रीय निवृत्ती घेतली.
