आधी दिला जोराचा चोप, मग थेट बत्त्या गुल; भर मैदानात फर्ग्युसन अन् स्मिथमध्ये ‘हाय व्होल्टेज ड्रामा’

मंगळवार रोजी (२८ सप्टेंबर) इंडियन प्रीमियर लीग २०२१ चा तिसरा डबल हेडर खेळला गेला. यातील पहिला सामना शारजाहच्या मैदानावर चांगल्या लयीत असलेल्या दिल्ली कॅपिटल्स विरुद्ध कोलकाता नाईट रायडर्स या संघात झाला. या सामन्यात कोलकाताच्या गोलंदाजांनी सुरुवातीपासून भेदक मारा करत दिल्ली संघाला बॅकफूटवर ठेवले. त्यामुळे सामना दर्शकांना फलंदाजीस पोषक असलेल्या या मैदानावर षटकार-चौकारांचा तितका वर्षाव पाहायला मिळाला नाही.

मात्र सामन्यादरम्यान बऱ्याचशा लक्षवेधी घटना घडल्या. त्यातही दिल्लीचा सलामीवीर स्टिव्ह स्मिथ आणि कोलकाताचा गोलंदाज लॉकी फर्ग्युसन यांच्यातील मजेशीर प्रसंग सर्वांचेच आकर्षण ठरला.

त्याचे झाले असे की, एका बाजूने विकेट जात असतानाही आयपीएल २०२१ च्या युएई टप्प्यातील आपला पहिलाच सामना खेळत असलेला स्मिथ चिवट झुंज देत होता. अशात कोलकाताकडून डावातील १३ वे षटक टाकण्यासाठी वेगवान गोलंदाज लॉकी फर्ग्युसन आला होता. त्याच्या या षटकातील पहिल्याच वेगवान चेंडूवर स्मिथने स्कूप शॉट खेळण्याचा प्रयत्न केला. परंतु चेंडू त्याच्या बॅटला न लागता थेट त्याच्या पोटाजवळ धडकला. यामुळे तो मैदानावर कोसळला. त्यानंतर वेदनेमुळे तो काही वेळ मैदानावरच झोपून राहिला. यादरम्यान सामनाही थांबवण्यात आला होता.

परंतु थोड्या वेळाने तो उठला आणि पुढील चेंडू खेळण्यासाठी सज्ज झाला. मात्र फर्ग्युसनने षटकातील दुसरा चेंडू इतक्या चपळाईने टाकला की, थेट स्मिथच्या दांड्या उडून पडल्या. स्मिथ आणि फर्ग्युसनमध्ये झालेल्या या प्रसंगाचा व्हिडिओ सध्या सोशल मीडियावर व्हायरल होतो आहे.

https://twitter.com/rishobpuant/status/1442808132451766273?s=20

दरम्यान स्मिथने या सामन्यात दिल्लीकडून सर्वाधिक ३९ धावा केल्या. ३४ चेंडूंचा सामना करताना ४ चौकारांच्या मदतीने त्याने ही धावसंख्या उभारली. त्याच्याखेरीज कर्णधार रिषभ पंतनेही ३६ चेंडूंमध्ये ३९ धावा केल्या. सलामीवीर शिखर धवनच्या बॅटमधून २४ धावा निघाल्या. या तिघांव्यतिरिक्त दिल्लीचा एकही फलंदाज दुहेरी धावसंख्या करू शकला नाही. परिणामी दिल्ली संघाने निर्धारित २० षटकांत ९ विकेट्सच्या मोबदल्यात १२७ धावा फलकावर लावल्या आहेत.

महत्त्वाच्या बातम्या-

वॉर्नरचे सनरायझर्स सोबतचे दिवस संपले का? खुद्द संघ प्रशिक्षकांनी दिले महत्त्वपूर्ण प्रश्नाचे उत्तर

इंजमाम-उल-हक यांना हृदयविकाराचा झटका, सचिन तेंडुलकरकडून लवकर बरे होण्यासाठी शुभेच्छा

श्रीसंत म्हणाला, ‘त्यावेळी २ लाखांची साधी पार्टी करायचो, मग मी १० लाखांसाठी स्पॉट फिक्सिंग का करू?’