ऑलिंपिक्स क्रिकेटचे वेळापत्रक जाहीर! किती संघ सहभागी होणार, फायनलची तारीख काय? जाणून घ्या सविस्तर

Cricket Schedule Olympics 2028: 128 वर्षांच्या दीर्घ प्रतीक्षेनंतर क्रिकेटचा खेळ ऑलिंपिक्समध्ये पुनरागमन करणार आहे. (Cricket Returns to Olympics) लॉस एंजेलिस ऑलिंपिक्स 2028च्या आयोजन समितीने क्रिकेटचे वेळापत्रक जाहीर केले आहे. ऑलिंपिक खेळांची सुरुवात 14 जुलै रोजी होणार असली तरी, क्रिकेटचे सामने त्यापूर्वी 2 दिवसांनीच सुरू होतील. ऑलिंपिक्समध्ये क्रिकेट सामने टी20 फॉरमॅटमध्ये खेळले जातील. पुरुष आणि महिला गटाचे ऑलिंपिक सामने 12 ते 29 जुलै या कालावधीत खेळले जातील. तर पदकांसाठीचे सामने 19 आणि 29 जुलै रोजी होतील. (Los Angeles Olympics Cricket)

क्रिकबझच्या रिपोर्टनुसार, क्रिकेटचे वेळापत्रक 2 सेटमध्ये विभागले आहे. पहिल्या सेटमधील सामने 12 ते 18 जुलैपर्यंत खेळले जातील आणि त्याचे पदक सामने 19 जुलै रोजी होतील. तर दुसऱ्या सेटमधील सामने 22 ते 28 जुलैपर्यंत खेळले जातील आणि त्याचे पदक सामने 29 जुलै रोजी होतील, यानंतर एक दिवसाने ऑलिंपिक खेळांचा समारोप होईल. पण, पुरुष स्पर्धा आधी होईल की महिला स्पर्धा हे अद्याप स्पष्ट झालेले नाही. क्रिकेट सामन्यांशी संबंधित अधिक माहिती याच वर्षाच्या शेवटच्या महिन्यांत उपलब्ध करून दिली जाईल.

आयोजन समितीने यापूर्वीच स्पष्ट केले आहे की, पुरुष आणि महिला स्पर्धांमध्ये प्रत्येकी एकूण 6-6 संघ सहभागी होतील. यासाठी फेअरग्राऊंड्स क्रिकेट स्टेडियमची निवड करण्यात आली आहे, जे लॉस एंजेलिसपासून 48 किलोमीटर अंतरावर आहे. (Fairgrounds Cricket Stadium)

ऑलिंपिक खेळांमध्ये क्रिकेट संघ कसे पात्र ठरतील हे देखील अद्याप स्पष्ट झालेले नाही. 17 ते 20 जुलै या कालावधीत आंतरराष्ट्रीय क्रिकेट परिषदेची सिंगापूरमध्ये वार्षिक परिषद होणार आहे, जिथे पात्रता प्रक्रियेवर चर्चा केली जाईल. (International Cricket Council Conference) रिपोर्टनुसार, संघ रँकिंगच्या आधारावर पात्र ठरू शकतात, परंतु गेल्या काही महिन्यांपासून पात्रता स्पर्धेबाबत देखील अटकळांनी जोर धरला आहे. जर पात्रता स्पर्धा झाली, तर त्यात काही सहयोगी देशही सहभागी होऊ शकतात.