आयपीएल 18व्या हंगामात, रॉयल चॅलेंजर्स बंगळुरूने 29 मे रोजी खेळल्या गेलेल्या पहिल्या क्वालिफायर सामन्यात पंजाब किंग्जचा 8 विकेट्सने पराभव करून अंतिम सामन्यात आपले स्थान निश्चित केले आहे. आरसीबीने या हंगामात मैदानावर उत्तम कामगिरी केली, ज्यामध्ये त्यांनी लीग टप्प्यात घराबाहेर खेळलेले सर्व 7 सामने जिंकले. यावेळी आरसीबी संघात गेल्या हंगामाच्या अंतिम फेरीत सहभागी झालेले चार खेळाडू देखील आहेत.
आयपीएल 2025 हंगामासाठी मेगा लिलावानंतर जेव्हा आरसीबी संघ पाहिला गेला तेव्हा त्यांच्या गोलंदाजीबद्दल सर्वाधिक चर्चा झाली, जरी संघाने मैदानावर ज्या पद्धतीने कामगिरी केली त्याने निश्चितच सर्वांना प्रभावित केले. यावेळी आरसीबी संघाकडून खेळणारे भुवनेश्वर कुमार, फिल साल्ट, मयंक अग्रवाल आणि सुयश शर्मा हे असे चार खेळाडू आहेत जे गेल्या हंगामाच्या अंतिम फेरीतही होते. आयपीएल 2024च्या हंगामातील विजेतेपदाचा सामना कोलकाता नाईट रायडर्स आणि सनरायझर्स हैदराबाद यांच्यात झाला, ज्यामध्ये फिल साल्ट आणि सुयश शर्मा केकेआर संघाचा भाग होते, तर भुवनेश्वर कुमार आणि मयंक अग्रवाल यांचा सनरायझर्स हैदराबाद संघात समावेश होता.
आरसीबीसाठी, या हंगामात या चारही खेळाडूंना त्यांच्या संघाचा भाग बनवण्याचा निर्णय पूर्णपणे योग्य ठरला आहे. भुवनेश्वर कुमारने गोलंदाजीत 15 सामन्यांमध्ये 13 बळी घेतले आहेत, तर सुयश शर्माची अद्भुत कामगिरी क्वालिफायर-1 सामन्यात दिसून आली. याशिवाय, फिल साॅल्टने सलामीवीर म्हणून जवळजवळ प्रत्येक सामन्यात संघाला जलद सुरुवात दिली. हंगामाच्या मध्यभागी देवदत्त पडिकलच्या जागी संघात समाविष्ट झालेल्या मयंक अग्रवालने लखनऊ सुपर जायंट्सविरुद्धच्या लीग टप्प्यातील शेवटच्या सामन्यात बॅटने महत्त्वपूर्ण खेळी केली आणि संघाला टॉप-2 स्थानावर पोहोचवण्यात महत्त्वाची भूमिका बजावली.
