IPL 2026 च्या सुरुवातीला आता अवघे १० दिवस उरले आहेत. या मोठ्या स्पर्धेचा पहिला सामना रॉयल चॅलेंजर्स बेंगळुरू (RCB) आणि सनरायझर्स हैदराबाद यांच्यात रंगणार आहे. आरसीबीने आयपीएल 2025 चे जेतेपद पटकावले होते, त्यामुळे आता ते नव्या हंगामाची सुरुवातही विजयानेच करण्याच्या निर्धाराने मैदानात उतरतील. सर्वांच्या नजरा विराट कोहलीवर खिळल्या आहेत. जर त्याचा हा हंगाम चांगला गेला, तर आरसीबी पुन्हा एकदा ट्रॉफीच्या जवळ पोहोचू शकते. मात्र, विराटसमोर आयपीएल 2026 मध्ये एक मोठे आव्हान असणार आहे. भारताचा माजी क्रिकेटपटू इरफान पठाणने विराटसमोरील या सर्वात मोठ्या आव्हानाबद्दल भाष्य केले आहे.
इरफान पठाणने आपल्या युट्यूब चॅनेलवर विराट कोहलीबद्दल मते मांडली. इरफानच्या मते, विराट आता सातत्याने क्रिकेट खेळत नाही, त्यामुळे त्याच्यासाठी आक्रमक शैलीत IPL खेळणे आव्हानात्मक ठरू शकते. तो म्हणाला, “यावेळी विराट कोहलीसाठी गोष्टी वेगळ्या असतील. पहिल्यांदाच तो कसोटी क्रिकेटमधून पूर्णपणे निवृत्त झाल्यानंतर खेळायला येईल. तो आता फक्त एकच फॉरमॅट खेळत आहे. अशा प्रकारचे बदल खेळाडूंसाठी सोपे नसतात. त्याची अलीकडची कामगिरी चांगली राहिली आहे, पण टी-२० मध्ये तुम्हाला आक्रमक खेळावे लागते. जेव्हा तुम्ही सराव किंवा पुरेसे क्रिकेट खेळून येत नसाल, तेव्हा हे कठीण जाते. याच कारणामुळे त्याच्यासाठी ही आयपीएल आव्हानात्मक असेल.”
इरफान पठाणने पुढे असेही नमूद केले की, IPL 2025 मध्ये विराट कोहलीचा स्ट्राईक रेट जास्त होता आणि त्यामुळेच त्याच्या संघाला मोठा फायदा झाला. माजी भारतीय क्रिकेटपटूचे असे मानणे आहे की, जर या वेळीही विराटने आपल्या स्ट्राईक रेटवर लक्ष केंद्रित केले, तर आरसीबीला त्याचा फायदा मिळू शकतो. तो म्हणाला, “यापूर्वीही त्याने अनेक आव्हानांचा सामना केला आहे. आगामी हंगाम त्याच्यासाठी कसा ठरतो, हे पाहणे औत्सुक्याचे ठरेल. विराट कोहली आणि RCB ही आता एक ओळख बनली आहे.”
पठाण पुढे म्हणाला, “विराटने आरसीबीकडून आपल्या कारकिर्दीची सुरुवात केली होती आणि आजही तो त्यांच्यासाठीच खेळत आहे. जेव्हा त्यांनी मागील हंगाम जिंकला, तेव्हा विराटचा स्ट्राईक रेट जास्त होता. त्याने केवळ अँकर (डाव सावरणारा) म्हणून भूमिका बजावली नाही, तर तो अत्यंत आक्रमक रूपात दिसला. ही खूप मोठी गोष्ट आहे. या वेळीही त्याच्याकडून त्याच फॉर्मची अपेक्षा असेल.”
