आयपीएल 2025 चा 18वा हंगाम (IPL 2025 season 18) आता अंतिम टप्प्यात येऊन पोहोचला आहे. आयपीएल 2025 च्या एलिमिनेटर सामन्यात, गुजरात टायटन्सला मुंबई इंडियन्सकडून (Gujrat titans vs Mumbai Indians) पराभव पत्करावा लागला आणि त्यांना स्पर्धेतून बाहेर पडावे लागले. एकेकाळी, गुजरात टायटन्स या हंगामात पहिल्या पायरीवर धावत होते आणि क्वालिफायर 1 तसेच अंतिम फेरी खेळण्याचा दावेदार मानले जात होते, परंतु गेल्या 3 सामन्यांमध्ये गुजरातसाठी सर्वकाही बदलले. एलएसजीकडून (LSG) पराभवानंतर गुजरातने पहिले स्थान गमावले, त्यानंतर आरसीबीच्या विजयामुळे संघ टॉप-2 मधून बाहेर पडला आणि एलिमिनेटरमध्ये प्रवेश केला.
या हंगामात, जिथे एकीकडे गुजरात टायटन्ससाठी सलामीवीर साई सुदर्शन(sai sudarshan), कर्णधार गिल(shubman gill), जोस बटलर(jos Buttler), प्रसिद्ध कृष्णा (prasiddh krushna) आणि मोहम्मद सिराज (mohommad siraj) या खेळाडूंनी अतिशय कमाल कामगिरी केली आहे तर, काही खेळाडूंनी या हंगामात निराशा केली आहे आणि फ्रँचायझीने त्यांच्यावर खूप पैसे खर्च केले आहेत. अशा परिस्थितीत, गुजरात टायटन्स पुढील हंगामापूर्वी या खेळाडूंना सोडू शकते.
आयपीएल 2025 च्या मेगा लिलावात गुजरात टायटन्सने फिरकी गोलंदाज रशीद खानला (Rashid khan) 18 कोटी रुपयांना कायम ठेवले होते, परंतु या हंगामात रशीदने त्याच्या खराब कामगिरीने संघाला निराश केले आहे. 13 सामन्यांमध्ये रशीदने फक्त 8 बळी घेतले.
टीम इंडियाचा अनुभवी वेगवान गोलंदाज इशांत शर्माला (Ishant sharma) गुजरात टायटन्सने 75 लाख रुपयांना खरेदी केले. या हंगामात इशांतला 7 सामने खेळण्याची संधी मिळाली, पण त्याची कामगिरी काही खास नव्हती. इशांतने 7 सामन्यांमध्ये केवळ 4 विकेट घेतल्या.
या हंगामात मधल्या फळीतील फलंदाज शाहरुख खानने (Shahrukh Khan) निराशा केली आहे. त्याला जवळजवळ प्रत्येक सामन्यात फलंदाजी करण्याची संधी मिळाली. त्याने सीझन-18 मध्ये 13 सामने खेळले, ज्यामध्ये शाहरुखने फलंदाजी करताना 147 धावा केल्या. या दरम्यान त्याच्या बॅटमधून एक अर्धशतक निघाले. एलिमिनेटर सामन्यात, जेव्हा संघाला त्याच्याकडून चांगल्या कामगिरीची अपेक्षा होती, तेव्हा तो फक्त 13 धावांवर बाद झाला.
