भारतीय क्रिकेट नियामक मंडळाच्या (BCCI) सूचनांनुसार, विजय हजारे ट्रॉफी 2025-26 च्या सुरुवातीच्या दोन सामन्यांत खेळण्यासाठी उतरलेल्या विराट कोहलीने आपल्या बॅटने शानदार कामगिरी केली. दिल्लीकडून खेळताना विराटने पहिल्या सामन्यात शतक, तर दुसऱ्या सामन्यात अर्धशतक झळकावले. यानंतर, डीडीसीएचे (DDCA) अध्यक्ष रोहन जेटली यांनी सांगितले होते की, भारत आणि न्यूझीलंड यांच्यातील वनडे मालिकेपूर्वी विराट विजय हजारे ट्रॉफीच्या चालू हंगामात आणखी एक सामना खेळेल, जो मंगळवारी म्हणजेच (6 जानेवारी 2026) रोजी रेल्वेविरुद्ध होणार होता. मात्र, आता दिल्लीच्या प्रशिक्षकांनी स्पष्ट केले आहे की, कोहली रेल्वेविरुद्धच्या सामन्यात खेळणार नाही. म्हणजेच विराट आता थेट न्यूझीलंडविरुद्धच्या एकदिवसीय सामन्यांमध्ये मैदानात दिसेल.
विजय हजारे ट्रॉफीमध्ये दिल्लीसाठी न खेळण्याचा विराट कोहलीचा निर्णय ऐनवेळी घेण्यात आला आहे. हा सामना आज म्हणजेच 6 जानेवारीला बंगळुरूमध्ये खेळवला जाणार आहे. बीसीसीआयच्या नियमांनुसार, विराट या स्पर्धेत दिल्लीसाठी आधीच दोन सामने खेळला आहे. त्याने आंध्र प्रदेश आणि गुजरातविरुद्ध सामने खेळले, ज्यामध्ये त्याने पहिल्या सामन्यात 131 धावांची शानदार शतकी खेळी केली, तर दुसऱ्या सामन्यात 77 धावा केल्या. या दमदार खेळींच्या जोरावर दिल्लीने सलग दोन विजय नोंदवले होते.
दिल्लीचे प्रशिक्षक सरनदीप सिंग यांनी ‘हिंदुस्तान टाइम्स’शी बोलताना सांगितले की, “नाही, तो या सामन्यासाठी उपलब्ध नाही.” बीसीसीआयच्या निर्देशानुसार, सेंट्रल कॉन्ट्रॅक्ट असलेल्या खेळाडूंना किमान दोन विजय हजारे ट्रॉफी सामने खेळणे अनिवार्य आहे, जे विराटने आधीच पूर्ण केले आहेत. दरम्यान, डीडीसीएचे अध्यक्ष रोहन जेटली यांनी गेल्या आठवड्यात म्हटले होते की, कोहली रेल्वेविरुद्धच्या सामन्यात खेळेल. दिल्लीसाठी खेळलेल्या दोन सामन्यांत विराट जबरदस्त फॉर्ममध्ये दिसला. या खेळींदरम्यान त्याने आणखी एक मोठा टप्पा गाठला आणि सर्वात जलद 16000 लिस्ट-ए धावा पूर्ण करणारा खेळाडू बनला. त्याने हा पराक्रम आपल्या 330 व्या डावात केला आणि सचिन तेंडुलकरचा विक्रम मोडीत काढला, ज्याने 391 डावांत हा आकडा गाठला होता.
