मुंबई । रोहित शर्माचे बालपणीचे प्रशिक्षक दिनेश लाड यांना आशा आहे की, त्यांचा शिष्य 2023 मध्ये भारतात होणार्या 50 षटकांच्या विश्वचषकात चांगली कामगिरी करेल. गेल्यावर्षी विश्वचषकात रोहितने पाच शतके ठोकली होती. पण उपांत्य फेरीत संघाचा पराभव झाला होता. भारताचा सर्वात मोठा क्रीडा सन्मान राजीव गांधी खेल रत्न पुरस्कारासाठी नुकतीच रोहितची निवड झाली.
मुंबईमधील क्रिकेटचे एक प्रख्यात प्रशिक्षक लाड यांनी मराठी क्रिकेट चॅट शो ‘कॉफी क्रिकेट अन् बरेच काही’ मध्ये सांगितले की, ”खेलरत्न मिळविणे ही एक मोठी कामगिरी आहे. मी असे म्हणू नये, परंतु एखाद्या गरीब मुलाकडे प्रतिभा असेल आणि त्याने ते सिद्ध केले आणि जर त्याने त्यास पाठिंबा दर्शविला तर तो मुलगा गगनाला स्पर्श करू शकतो आणि त्याचे जिवंत उदाहरण म्हणजे रोहित शर्मा. त्याने हे सर्व आपल्या परिश्रम आणि कौशल्याच्या जोरावर मिळवले. मला आशा आहे की, रोहितने आगामी 50 षटकांच्या विश्वचषकात आपल्या क्षमतेच्या जोरावर भारताला विश्वचषक जिंकून द्यावा.”
लाडने पहिल्यांदा रोहित शर्माचा एक किस्सा सांगितला. ते म्हणाले, ”बोरिवली येथे एक शिबिराचे आयोजन करण्यात आले होते आणि काही सामने घेण्यात आले होते. त्यात मी माझ्या शाळेच्या संघाला खेळविले. माझ्या व रोहितच्या टीमने अंतिम फेरी गाठली. सिमेंट विकेटवरील हा 10 षटकांचा सामना होता आणि आम्ही तो सामना जिंकला. आमची शाळा नवीन होती आणि मी प्रतिभावान मुले शोधत होतो, रोहितने ज्या पद्धतीने गोलंदाजी केली. ती पाहून मी खूप प्रभावित झालो आणि मला वाटले की आम्ही या मुलाला आमच्या शाळेत नेले पाहिजे.”
जर प्रवेश घेतला नसता तर रोहित आंतरराष्ट्रीय क्रिकेटर बनू शकला नसता. लाड यांच्या म्हणण्यानुसार, रोहितचे काका शाळेची फी भरू शकत नव्हते. त्यांच्या सांगण्यावरून रोहितला शाळेत विनामूल्य प्रवेश दिला. ते म्हणाले, “मी शाळेच्या संचालकांना फी कमी करण्यास सांगितले आणि रोहित हा पहिला मुलगा होता ज्यासाठी मी असे केले होते, त्यावेळी मला वाटत नव्हते की तो भारताकडून खेळेल. त्यांनी त्याला शाळेत दाखल केले. त्यावेळी तसे झाले नसते तर तुम्ही रोहित शर्माला आंतरराष्ट्रीय क्रिकेटमध्ये पाहिले नसते,” असे लाड यांनी सांगितले.
