आज २० ऑगस्ट, क्रिकेटमध्ये या दिवशी घडलेल्या घटनांचा हा आढावा…
चार्ल्स बॅनरमन यांचा मृत्यू ( १९३० )
आंतरराष्ट्रीय क्रिकेटमधील खेळल्या गेलेल्या पहिल्यावहिल्या कसोटीत ऑस्ट्रेलियाचे प्रतिनिधित्व करणारे चार्ल्स बॅनरमन यांचा आज स्मृतिदिन. आंतरराष्ट्रीय क्रिकेटमध्ये पहिला चेंडू खेळण्याचा, पहिली धाव काढण्याचा, पहिले अर्धशतक झळकावण्याचा व पहिले शतक ठोकण्याचा मान बॅनरमन यांच्याकडे जातो.
पाकिस्तान संघाने मैदानात न उतरण्याचा निर्णय घेतला ( २००६ )
पाकिस्तान संघ इंग्लंड दौऱ्यावर गेला असता ओव्हल कसोटीच्या अखेरच्या दिवशी, चहापानानंतर, पाकिस्तान संघाने मैदानात न उतरण्याचा निर्णय घेतला. कारण, पंच डॅरेल हेयर यांनी पाकिस्तानी खेळाडूंवर चेंडू कुरतडल्याचा आरोप केला होता. बराच वेळ देऊनही पाकिस्तानी संघ मैदानात न उतरल्याने पंचांनी सामना इंग्लंडला बहाल केला.
इंग्लिश महिला क्रिकेटपटू नतालिया स्किवरचा जन्म ( १९९२ )
इंग्लंड महिला संघाला २०१७ महिला क्रिकेट विश्वचषक जिंकून देण्यात सिंहाचा वाटा उचलणारी नतालिया स्किवर हीचा जन्मदिवस. तीने साखळी सामन्यात दोन शतके तर अंतिम सामन्यात अर्धशतक झळकावले होते. याच बरोबरीने तिने ७ बळी देखील आपल्या नावे केले होते. २०१८ सालचा ‘ महिला विस्डेन क्रिकेटर ऑफ द इयर ‘ पुरस्कार तिला मिळाला आहे.
ऑस्ट्रेलियन क्रिकेटपटू रॉब क्युनी याचा जन्म ( १९८२ )
ऑस्ट्रेलियाचा माजी आंतरराष्ट्रीय क्रिकेटपटू रॉब क्युनी याचा ब्रायटन येथे जन्म. क्युनी याने ऑस्ट्रेलियाकडून २ आंतरराष्ट्रीय कसोटी सामने खेळले आहेत. बिग बॅशमध्ये मेलबन स्टार्स व आयपीएलमध्ये राजस्थान रॉयल्स संघाचे प्रतिनिधित्व त्याने केले आहे. सध्या तो ऑस्ट्रेलियातील स्थानिक स्पर्धांमध्ये प्रशिक्षकाची भूमिका निभावतो.