भारतीय संघातील ५ सक्रिय खेळाडू ज्यांनी खेळलाय फक्त एक कसोटी सामना

अनेक खेळाडूंचे स्वप्न असते की त्यांना भारतीय संघाकडून खेळायला मिळावे. तर बरेचशे खेळाडू जे वनडे किंवा टी२० संघातून भारताचे प्रतिनिधित्त्व करतात त्यांचे स्वप्न असते की त्यांनी एकदा तरी कसोटी क्रिकेट खेळावे. तर, असेही काही खेळाडू आहेत ज्यांनी कसोटी क्रिकेटमधून भारतीय संघात पदार्पण केले. त्यानंतर त्यांना वनडे संघात स्थान मिळाले.

वेळेनुसार भारतीय संघाने कसोटी क्रिकेटमध्ये शानदार प्रदर्शन करत क्रिकेटविश्वात आपली वेगळी ओळख निर्माण केली. वर्तमान काळातही भारतीय कसोटी संघातील अनेक खेळाडू क्रिकेटविश्वात आपल्या कामगिरीने वेगळी ओळख निर्माण करण्यात यशस्वी राहिले आहेत. परंतु, भारतातील असेही काही सक्रिय खेळाडू आहेत, जे फक्त एक कसोटी सामना खेळू शकले. तर, असेही काही खेळाडू आहेत, ज्यांनी रणजी ट्रॉफीमध्ये सलग उत्कृष्ट प्रदर्शन केले. पण, त्यांना भारतीय कसोटी संघातून खेळण्याची संधी मिळाली नाही.

या लेखात अशाच ५ सक्रिय भारतीय खेळाडूंचा आढावा घेण्यात आला आहे, ज्यांना भारतीय संघाकडून फक्त एक कसोटी सामना खेळण्याची संधी मिळाली आहे. (5 Current Indian Players Who Played Only one Test Match) –

विनय कुमार –

या गोलंदाजाने भारताकडून फक्त एक कसोटी सामना खेळला आहे. जानेवारी २०१२मध्ये पर्थ येथे ऑस्ट्रेलियाविरुद्ध झालेल्या  तिसऱ्या कसोटी सामन्यातून विनय कुमारने कसोटीत पदार्पण केले होते. यावेळी पहिल्या सामन्यातच विनयने मायकल हसीची विकेट घेतली होती. परंतु, ऑस्ट्रेलियाने तो सामना एक डाव आणि ३७ धावांनी खिशात घातला होता. त्या सामन्यानंतर विनयला भारतीय कसोटी संघात स्थान मिळाले नाही. असे असले तरी, त्याने भारताकडून ३१ वनडे आणि ९ टी२० सामने खेळले आहेत.

नमन ओझा –

नमन ओझा या यष्टीरक्षक फलंदाजाने एमएस धोनीच्या काळात दमदार कामगिरी केली होती. पण, त्याला भारताकडून फक्त एक कसोटी सामना खेळायला मिळाला. २०१५ला कोलंबो येथे श्रीलंकाविरुद्धच्या सामन्यातून ओझाने कसोटीत पदार्पण केले होते. यावेळी पदार्पणाच्या सामन्यातील पहिल्या डावात ओझाने २१ आणि दुसऱ्या डावात ३५ धावा केल्या होत्या. त्यानंतर त्याला भारतीय कसोटी संघात पुनरागमन करण्याची संधी मिळाली नाही.