कोण आहे आयपीएलमध्ये पहिल्यांदा खेळणारा अमेरिकन क्रिकेटर? जाणून घ्या ५ रोमांंचक गोष्टी

सीपीएल पदार्पणाच्या सामन्यातच केले होते कुमार संगाकाराला बाद 

अली खानला २०१६ साली कॅरेबियन प्रीमियर लीग (सीपीएल)च्या गयाना अमेझॉन वॉरियर्स संघाकडून खेळण्याची संधी मिळाली. तेव्हा त्याने आपल्या सीपीएल पदार्पणाच्या सामन्यात पहिल्या चेंडूवर श्रीलंकेचा दिग्गज फलंदाज कुमार संगकाराची विकेट चटकावली होती. ती त्याची पूर्ण हंगामातील एकमेव विकेट ठरली होती.

अली खानने त्या सामन्यात ३.५ षटके गोलंदाजी करत ४९ धावा दिल्या होत्या. त्यावेळी त्याचा इकोनॉमी रेट हा १२.७८ इतका होता. त्यानंतर अली खानने आतापर्यंत सीपीएलमध्ये ३१ सामने खेळत ३५ विकेट्स चटकावल्या आहेत. यावेळी त्याचा इकोनॉमी रेट हा ८.३३ इतका होता.

चेंडूला दोन्ही बाजूने करु शकतो स्विंग, आहे टी२० स्पेशलिस्ट

अली खानच्या गोलंदाजीची विशेषता ही आहे की, तो चेंडूला दोन्ही बाजूने स्विंग करु शकतो. तसेच तो खूप चांगला यॉर्कर टाकू शकतो, ज्यामुळे तो सहज फलंदाजांना त्रिफळाचीत करु शकतो. सोबतच तो सामन्याच्या सुरुवातीच्या षटकात आणि डेथ ओव्हरमध्येही गोलंदाजी दमदार प्रदर्शन करु शकतो.

यावर्षीच्या सीपीएल हंगामातही अली खानने फलंदाजांना मोठ्या संकटात टाकले होते. त्याने आपल्या वेगवान गोलंदाजीने फलंदाजांना सतावत ८ विकेट्सची आपल्या खात्यात नोंद केली होती. तो सीपीएल २०२०च्या विजेत्या ट्रिबँगो नाईट रायडर्स संघाचा भाग होता.

अशी आहे अली खानची क्रिकेट कारकिर्दीतील आकडेवारी

अली खानने अमेरिका क्रिकेट संघाकडून आतापर्यंत केवळ १ वनडे सामना खेळला आहे. हा सामना २७ एप्रिल २०१९ला पपुआ न्यू गिनी संघाविरुद्ध खेळण्यात आला होता. त्यात त्याने ४.६०च्या इकोनॉमी रेटने १ विकेट चटकावली होती.

तर, अ दर्जाच्या क्रिकेटमध्ये त्याने ९ सामने खेळत २३ विकेट्स घेतल्या आहेत. देशांतर्गत स्तरावरील टी२० क्रिकेटमधील त्याची आकडेवारी उल्लेखनीय आहे. आजवर अली खानने ३६ देशांतर्गत टी२० सामने खेळत ३८ विकेट्स चटकावल्या आहेत.

खेळल्यात अनेक मोठ्या टी२० लीग

अली खान जगातील अनेक टी२० लीगमध्ये खेळला आहे. कॅरेबियन प्रीमियर लीगमध्ये तो गयाना अमेझॉन वॉरियर्स आणि ट्रिबॅगो नाईट रायडर्स संघाकडून खेळला आहे. तर, पाकिस्तान सुपर लीगमध्ये तो कराची किंग्स संघाकडून खेळला आहे.

बांग्लादेश प्रीमियर लीगमध्ये तो खुलाना टायटन संघाकडून खेळला आहे. कॅनडा ग्लोबल टी२० लीगमध्ये तो वेक्युर नाइट्स आणि विम्पिंग हग्स संघांचा भाग होता. अफघानिस्तान प्रीमियर लीगमध्ये काबुल जव्नान संघाचा भाग होता. तर, युएईत खेळल्या जाणाऱ्या टी२० लीगमध्ये तो दिल्ली बुल्स आणि बंगाल टायगर्स संघाकडून खेळला आहे.

अशाप्रकारे अली खानला बऱ्याच टी२० लीगमध्ये खेळण्याचा अनुभव आहे.

ट्रेंडिंग लेख-