आयसीसी टी-२० वर्ल्ड कप २०२६ ची सुरुवात ७ फेब्रुवारीपासून होत आहे. यावेळी स्पर्धेत एकूण २० संघ सहभागी होत असून, त्यांची चार गटांत विभागणी करण्यात आली आहे. लीग स्टेजमध्ये प्रत्येक गटातील २-२ संघ सुपर-८ मध्ये पोहोचतील, त्यानंतर बाद फेरीचे (नॉकआउट) सामने सुरू होतील. क्रिकेटच्या टी-२० फॉरमॅटमध्ये गोलंदाजी करणे सर्वात कठीण मानले जाते, परंतु या आव्हानात्मक परिस्थितीतही काही गोलंदाज अप्रतिम कामगिरी करतात. या फॉरमॅटमध्ये असे काही गोलंदाज झाले आहेत ज्यांनी आयसीसी टी-२० वर्ल्ड कपमध्ये हॅट्ट्रिक घेण्याची किमया साधली आहे. अशातच, ही स्पर्धा सुरू होण्यापूर्वी, टी-२० वर्ल्ड कपमध्ये हॅट्ट्रिक घेऊन इतिहास रचणाऱ्या त्या आठ गोलंदाजांबद्दल जाणून घेऊया.
आयसीसी टी-२० वर्ल्ड कपच्या इतिहासात हॅट्ट्रिक घेणारा पहिला गोलंदाज ऑस्ट्रेलियाचा माजी दिग्गज गोलंदाज ब्रेट ली आहे. ब्रेट लीने २००७ मध्ये बांगलादेशविरुद्ध ही कामगिरी केली होती.
ब्रेट लीनंतर, तब्बल १४ वर्षांनी आयसीसी टी-२० वर्ल्ड कपमध्ये आयर्लंडच्या कर्टिस कॅम्फरने हॅट्ट्रिक घेतली. कॅम्फरने ही कामगिरी २०२१ च्या टी-२० वर्ल्ड कपमध्ये नेदरलँड्सविरुद्ध केली होती. याचसह कर्टिस कॅम्फर टी-२० वर्ल्ड कपच्या इतिहासात हॅट्ट्रिक घेणारा दुसरा गोलंदाज ठरला.
श्रीलंकेचा अष्टपैलू खेळाडू वानिंदू हसरंगाने देखील २०२१ च्या टी-२० वर्ल्ड कपमध्येच हॅट्ट्रिक घेण्याची कमाल केली होती. कर्टिस कॅम्फरनंतर हसरंगाने घेतलेल्या हॅट्ट्रिकने मोठी चर्चा घडवून आणली होती. हसरंगाने ही कामगिरी दक्षिण आफ्रिकेविरुद्धच्या सामन्यात केली होती. ही या स्पर्धेच्या इतिहासातील तिसरी हॅट्ट्रिक होती.
आयसीसी टी-२० वर्ल्ड कप २०२१ मध्येच दक्षिण आफ्रिकेचा वेगवान गोलंदाज कगिसो रबाडाने देखील हॅट्ट्रिक घेऊन खळबळ उडवून दिली होती. रबाडाने इंग्लंडविरुद्धच्या सामन्यात ही कामगिरी केली होती आणि ही टी-२० वर्ल्ड कपमधील चौथी हॅट्ट्रिक होती.
संयुक्त अरब अमिराती (यूएई) चा कार्तिक मयप्पन आयसीसी टी-२० वर्ल्ड कपमध्ये हॅट्ट्रिक घेणारा पाचवा गोलंदाज आहे. मयप्पनने ही कामगिरी २०२२ च्या आयसीसी टी-२० वर्ल्ड कपमध्ये केली होती. त्याने श्रीलंकेविरुद्ध हॅट्ट्रिक घेऊन इतिहास रचला होता.
आयसीसी टी-२० वर्ल्ड कप २०२२ मध्येच आयर्लंडचा वेगवान गोलंदाज जोश लिटलने हॅट्ट्रिक घेण्याची कमाल केली होती. जोश लिटलने ही कामगिरी न्यूझीलंडविरुद्ध केली आणि आयसीसी टी-२० वर्ल्ड कपमध्ये हॅट्ट्रिक घेणारा तो सहावा गोलंदाज ठरला.
ऑस्ट्रेलियाचा वेगवान गोलंदाज पॅट कमिन्सने आयसीसी टी-२० वर्ल्ड कप २०२४ मध्ये सलग दोन वेळा हॅट्ट्रिक घेण्याचा पराक्रम केला. कमिन्सने पहिली हॅट्ट्रिक बांगलादेशविरुद्ध आणि त्याच्या पुढच्याच सामन्यात अफगाणिस्तानविरुद्ध पुन्हा हॅट्ट्रिक घेऊन इतिहास रचला. सलग दोन हॅट्ट्रिक घेणारा कमिन्स हा जगातील एकमेव गोलंदाज आहे.
आयसीसी टी-२० वर्ल्ड कप २०२४ मध्येच इंग्लंडचा वेगवान गोलंदाज ख्रिस जॉर्डनने देखील हॅट्ट्रिक मिळवली होती. जॉर्डनने ही कामगिरी अमेरिकेविरुद्धच्या (USA) सामन्यात केली होती. याचसह टी-२० वर्ल्ड कपमध्ये हॅट्ट्रिक घेणारा ख्रिस जॉर्डन ८ वा गोलंदाज ठरला.
