महाराष्ट्र राज्य कबड्डी असोसिएशन व कोल्हापूर जिल्हा कबड्डी असोसिएशन यांच्या मान्यतेने जांभळी क्रीडा मंडळ, जांभळी यांच्या सौजन्याने राज्यस्तरीय व्यावसायिक निमंत्रीत पुरुष कबड्डी स्पर्धेचं आयोजन करण्यात आले आहे. स्व. डॉ आप्पासाहेब उर्फ सा. रे. पाटीलसाहेब माजी आमदार यांच्या स्मरणार्थ स्पर्धेचं आयोजन करण्यात आले आहे.
काल दिनांक ३ मार्च २०२० रोजी स्पर्धेचं उद्घाटन झालं. स्पर्धेत एकूण १४ संघानी सहभाग घेतला आहे. पहिल्या दिवशी एयर इंडिया, महिंद्रा अँड महिंद्रा, इनकम टॅक्स पुणे, महाराष्ट्र पोलीस, आयएसपील युवा पलटण, सेंट्रल बँक संघानी साखळीत विजयी सुरुवात केली.
पहिला उद्घाटन सामना एयर इंडिया विरुद्ध शिवान्स एंटरप्राइजेस यांच्यात झाला. एयर इंडियाने ३७-१० असा सहज विजय मिळवत विजयी सलामी दिली. तर दुसऱ्या सामन्यांत महिंद्रा अँड महिंद्राने ५०-३१ असा मुंबई पोलीसवर विजय मिळवला. महिंद्राकडून ओमकार जाधव, स्वप्नील शिंदे यांनी चांगला खेळ केला.
क गटात इनकम टॅक्स पुणे विरुद्ध महाडिक कोल्हापूर यांच्यात चांगली चुरशीची लढत झाली. इनकम टॅक्स पुणे संघाने २८-२२ असा विजय मिळवला. तर क गटातील दुसऱ्या सामन्यांत महाराष्ट्र पोलीस संघाने ४५-२९ एकतर्फी विजय मिळवला. महाराष्ट्र पोलीस संघाकडून महेंद्र राजपूत यांनी उत्कृष्ट खेळ केला.
ड गटात झालेल्या आयएसपील युवा पलटण विरुद्ध ठाणे महानगरपालिका यांच्यात झालेल्या लढतीत आयएसपील युवा पलटणने ३२-१९ बाजी मारली. तर सेंट्रल बँकने टीबीएम रायगड संघावर ४१-२० सहज मात केली.