आशिष नेहराने मारली चहलच्या कंबरेत लाथ, गुजरातने शेअर केलेल्या फोटोची रंगलीय चर्चा

इंडियन प्रीमिअर लीग म्हणजेच आयपीएल २०२२ हंगामातील प्लेऑफचे सामने मंगळवारी म्हणजेच २४ मे पासून सुरू होणार आहेत. पहिला क्वालिफायर गुजरात टायटन्स आणि राजस्थान रॉयल्स यांच्यात खेळला जाईल. उभय संघातील हा सामना जो संघ जिंकेल, त्याला थेट अंतिम सामन्यात संधी मिळणार आहे. सामना सुरू होण्यापूर्वी गुजरात टायटन्सच्या अधिकृत सोशल मीडिया खात्यावरून काही फोटो शेअर केले गेले आहेत. फोटोत आशिष नेहरा युजवेंद्र चहलच्या कंबरेत लाथ मारताना दिसत आहे.

भारतीय संघाचा फिरकी गोलंदाज युजवेंद्र चहल (Yuzvebdra Chahal) त्याच्या मजेशीर अंदाजासाठी ओळखला जातो, तर भारताचा माजी दिग्गज वेगवान गोलंदाज आशिष नेहरा (Ashish Nehra) देखील अनेकदा मैदानात अशाच प्रकारे मजा- मस्ती करताना दिसला आहे. आयपीएल २०२२मध्ये या दोघांनी स्वतःची गुणवत्ता सिद्ध केली आहे. चहलने राजस्थान रॉयल्सचे प्रतिनिधित्व करताना हंगामात सर्वात जास्त विकेट्स घेतल्या आहेत, तर दुसरीकडे प्रशिक्षकाच्या भूमिकेत नेहराने यावर्षी नव्याने सहभागी झालेला संघ गुजरात टायटन्सला प्लेऑफमध्ये स्थान मिळवून दिले आहे.

आता मंगळवारी कोलकाताच्या ईडन गार्डन्स स्टेडियमवर राजस्थान आणि गुजरात संघांचा आमना-सामना होणार आहे. या क्वालिफायर एक सामन्यापूर्वी चहल आणि नेहरा यांच्यातील मैत्रीपूर्ण संबंध चाहत्यांना पाहायला मिळाले. नेहराने मजेमध्ये चहलच्या कंबरेत लाथ मारल्याचे फोटोमध्ये पाहायला मिळत आहे. दोघांच्या चेहऱ्यावर हास्य देखील पाहायला मिळत आहे. गुजरात टायटन्सने शेअर केलेले फोटो सोशल मीडियावर वेगात व्हायरल होत आहेत.

Absolutely Kicked to have Yuzi and Nehraji bless us with this moment ????????????#AavaDe #SeasonOfFirsts #GTvRR pic.twitter.com/OlXTazPZJw

— Gujarat Titans (@gujarat_titans) May 24, 2022