एशिया कप 2025चं वेळापत्रक जाहीर झालं आहे. भारत आणि पाकिस्तान यांच्यातील सामना 14 सप्टेंबर रोजी होणार आहे. याशिवाय सुपर 4 टप्प्यातही दोन्ही संघ आमने-सामने येऊ शकतात. अगदी अंतिम सामन्यातही हे दोन संघ भिडू शकतात. त्यामुळे वेळापत्रक जाहीर झाल्यापासूनच हा सामना वादात सापडला आहे. अशा परिस्थितीत, वर्ल्ड चॅम्पियनशिप ऑफ लिजेंड्समधील सामन्याप्रमाणेच, एशिया कप 2025मधील हा महामुकाबला रद्द होण्याची शक्यता निर्माण झाली आहे.
पहलगाममधील दहशतवादी हल्ल्यानंतर भारत-पाकिस्तान संबंध पुन्हा एकदा खूपच तणावपूर्ण झाले. त्यानंतर भारताने ‘ऑपरेशन सिंदूर’ राबवले. या सर्व घटनांनंतर भारतीय चाहत्यांनी पाकिस्तानसोबत क्रिकेट संबंध तोडण्याची मागणी केली. याच कारणामुळे वर्ल्ड चॅम्पियनशिप ऑफ लिजेंड्स 2025 मध्ये इंडिया चॅम्पियन्स आणि पाकिस्तान चॅम्पियन्स यांच्यातील सामना रद्द करण्यात आला होता. आता एशिया कप 2025 चं वेळापत्रक जाहीर झाल्यानंतरही चाहत्यांनी बीसीसीआयवर टीका करण्यास सुरुवात केली आहे. चाहते आता या दोन संघांमध्ये कोणताही सामना होऊ देऊ इच्छित नाहीत. त्यामुळेच बीसीसीआयवर दबाव वाढला असून, हा महामुकाबला रद्द करण्याचा निर्णय घेण्यात येऊ शकतो.
सध्या तरी स्पर्धा सुरू होण्यासाठी महिन्याहून अधिक वेळ बाकी आहे. मात्र, सामना जसजसा जवळ येईल, तसतसा चाहत्यांचा विरोध अधिक तीव्र होण्याची शक्यता आहे. सध्या चाहते बीसीसीआय आणि खेळाडूंवर जोरदार टीका करत आहेत. सामना खेळायचा की नाही, हे ठरवण्याचा अंतिम निर्णय बीसीसीआय आणि खेळाडूंचाच असेल. त्यामुळे सगळ्यांचं लक्ष आता या निर्णयाकडे लागले आहे. या प्रकरणात भारत सरकारची भूमिका काय असेल, हेही पाहणं महत्त्वाचं ठरेल. भारत आणि पाकिस्तान यांच्यात शेवटचा सामना 2025 च्या सुरुवातीला झालेल्या आयसीसी चॅम्पियन्स ट्रॉफीदरम्यान खेळला गेला होता.
