Indian Test Captain Shubman Gill: उद्यापासून (20 जून) भारत-इंग्लंड संघातील 5 सामन्यांच्या कसोटी मालिकेला सुरूवात होणार आहे. शुबमन गिलच्या नेतृत्वाखाली भारताचा युवा संघ 5 सामन्यांची कसोटी मालिका खेळण्यासाठी इंग्लंडला गेला आहे. विराट कोहली, रोहित शर्मा आणि रविचंद्रन अश्विन यांसारख्या दिग्गजांच्या निवृत्तीनंतर भारतीय संघाची ही पहिली कसोटी मालिका आहे. भारतीय संघ लीड्समध्ये शुक्रवार, 20 जूनपासून पहिला कसोटी सामना खेळेल. त्यापूर्वी कर्णधार शुबमन गिलने पत्रकार परिषद घेतली. (Shubman Gill Press Conference)
भारताचा नवा कसोटी कर्णधार शुबमन गिलने गुरुवारी सांगितले की, इंग्लंड, ऑस्ट्रेलिया, न्यूझीलंड आणि दक्षिण आफ्रिका यांच्याविरुद्ध कसोटी मालिका जिंकणे, आयपीएल (Indian Premier League) विजेतेपद जिंकण्यापेक्षा मोठी उपलब्धी आहे.
इंग्लंडमध्ये कसोटी मालिका जिंकणे आणि आयपीएल विजेतेपद यापैकी तो कोणाला प्राधान्य देईल, असे विचारले असता, तो म्हणाला, “निश्चितपणे कसोटी मालिकेतील विजयाला. कर्णधार म्हणून तुम्हाला इंग्लंड दौऱ्याची जास्त संधी मिळत नाही. जर तुम्ही तुमच्या पिढीतील सर्वोत्कृष्ट खेळाडूंपैकी असाल तर कदाचित 2 दौरे किंवा 3. आयपीएल दरवर्षी होते आणि दरवर्षी संधी मिळते. माझ्या मते इंग्लंड, ऑस्ट्रेलिया, न्यूझीलंड आणि दक्षिण आफ्रिकेत विजय मिळवणे मोठे आहे.”
इंग्लंडमध्ये लाल चेंडूने खेळण्याचा गिलला अनुभव नसला तरी, तो आव्हानाने विचलित झालेला नाही. तो म्हणाला, “अनेक लोक म्हणतात की तुमच्या संघात तेवढा अनुभव नाही, पण चांगली गोष्ट अशी आहे की आमच्यावर अपेक्षांचे जास्त ओझे नसेल, कारण बहुतेक खेळाडू इंग्लंडमध्ये खेळलेले नाहीत. याचा खूप फरक पडेल.”
गिल पुढे म्हणाला, “गेल्या 5 ते 10 वर्षांत आमच्या सीनियर्सकडून आम्हाला जो ब्लूप्रिंट मिळाला आहे, तो हाच आहे की आम्ही कुठेही जिंकू शकतो. आम्ही त्याच आत्मविश्वासाने खेळण्याचा प्रयत्न करू.”
तो म्हणाला की, त्याचे आणि मुख्य प्रशिक्षक गौतम गंभीरचे मत आहे की, कोहलीच्या निवृत्तीनंतर त्याने चौथ्या क्रमांकावर फलंदाजी करायला हवी. तो म्हणाला, “विराट भाईच्या कसोटी क्रिकेटमधून निवृत्तीनंतर मी आणि गौतम गंभीर भाईने यावर चर्चा केली आणि आम्ही दोघेही यावर एकमत झालो की, मी चौथ्या क्रमांकावर उतरायला हवे.” (Shubman Gill Batting Position)
गिलने असेही सांगितले की, तो संघात सुरक्षिततेचे वातावरण निर्माण करू इच्छितो, जेणेकरून खेळाडू आपले सर्वोत्तम प्रदर्शन करू शकतील. तो म्हणाला, “जर आम्ही असे करण्यात यशस्वी झालो, तर कसोटी मालिका आणि डब्ल्यूटीसी चक्रात खूप यशस्वी होऊ. खेळाडूंशी स्पष्ट संवाद साधणे आवश्यक आहे की तुम्हाला त्यांच्याकडून काय अपेक्षा आहेत. त्यांना त्यांचा नैसर्गिक खेळ खेळण्याचे स्वातंत्र्य मिळायला हवे.” (WTC Cycle Strategy)
गिलने हेही सांगितले की, आयपीएलदरम्यान त्याने इंग्लंड दौऱ्याच्या तयारीसाठी विराट आणि रोहितशी सल्ला घेतला होता. तो म्हणाला, “मी आयपीएलदरम्यान दोघांनाही भेटलो आणि त्यांनी आपल्या अनुभवांबद्दल सांगितले. विशेषतः येथे इंग्लंडमध्ये. इंग्लंडविरुद्ध आम्ही भारतात (2023-24) जी मालिका खेळलो, ती माझ्या सर्वोत्तम मालिकांपैकी एक होती. त्यातही आमचे वरिष्ठ खेळाडू प्रत्येक सामन्यात उपलब्ध नव्हते.”
