नामीबियाविरुद्धच्या सामन्याआधी भारतीय संघासाठी एक वाईट बातमी आहे. स्टार फलंदाज अभिषेक शर्मा (Abhishek Sharma) अजूनही पूर्णपणे फिट नाही. टीम इंडियाचे सहाय्यक प्रशिक्षक रयान टेन डोशेट यांनी पत्रकार परिषदेत माहिती दिली की, अभिषेकच्या पोटात काही त्रास असून तो अद्याप त्यातून सावरलेला नाही. त्यामुळे नामीबियाविरुद्धच्या सामन्यात त्याचे खेळणे कठीण दिसत आहे. मात्र, दुसऱ्या सामन्यापर्यंत तो फिट होईल, अशी आशा प्रशिक्षकांनी व्यक्त केली आहे.
जर अभिषेक शर्मा नामीबियाविरुद्ध खेळू शकला नाही, तर त्याच्या जागी संजू सॅमसनला अंतिम 11 खेळाडूंमध्ये (Playing 11) संधी मिळू शकते. अमेरिकेविरुद्धच्या सामन्यात संजूला संघात स्थान मिळाले नव्हते.
भारतीय चाहत्यांसाठी एक आनंदाची बातमी म्हणजे स्टार वेगवान गोलंदाज जसप्रीत बुमराह (Jasprit Bumrah) आता फिट झाला आहे. आजारपणामुळे तो अमेरिकेविरुद्धचा पहिला सामना खेळू शकला नव्हता, पण आता तो नामीबियाविरुद्ध गोलंदाजी करण्यासाठी सज्ज आहे. दुसरीकडे, अष्टपैलू वॉशिंग्टन सुंदर (Washington Sundar) देखील संघात सामील झाला आहे. सुंदरने नुकताच व्यायामाचा व्हिडिओ शेअर केला असला तरी, तो अजून 100 टक्के फिट झालेला नाही.
भारत आणि नामीबिया (India vs Namibia) यांच्यातील हा सामना 12 फेब्रुवारी रोजी दिल्लीतील अरुण जेटली क्रिकेट स्टेडियमवर खेळला जाणार आहे.
