जगप्रसिद्ध अशा इंडियन प्रीमियर लीग (आयपीएल)च्या चेन्नई सुपर किंग्स (सीएसके) संघाला कोण ओळखत नाही. सीएसके हा आयपीएलच्या इतिहासातील दूसरा सर्वात यशस्वी संघ आहे. त्यांनी आजवर तब्बल ३ वेळा आयपीएल ट्रॉफी पटकावली आहे. सीएसकेच्या या यशामागे भारताचा माजी कर्णधार एमएस धोनीचा हात आहे, असे म्हणणे वावगे ठरणार नाही.
धोनी हा संघाचे नेतृत्त्व करण्याबरोबर दमदार फटकेबाजी आणि यष्टीमागे उत्कृष्ट कामगिरी करण्यातही पटाईत आहे. त्याला आयपीएलमधील सर्वोत्कृष्ट यष्टीरक्षकांमध्ये गणले जाते. अशात धोनीच्या सीएसके संघात दूसऱ्या कोणत्या यष्टीरक्षक फलंदाजाला खेळण्याची संधी मिळणे जवळपास अशक्य आहे. असे असले तरी, देशांतर्गत क्रिकेटमधील एक युवा यष्टीरक्षक फलंदाजाला गेल्या २ वर्षांपासून सीएसकेकडून आयपीएलमध्ये पदार्पण करण्याची अपेक्षा करत आहे. हा खेळाडू म्हणजे, तमिळनाडूचा नारायण जगदीशन.
२४ डिसेंबर १९९५ रोजी तमिळनाडूच्या कोईमतूर येथे जन्मलेला जगदीशन हा धुरंदर सलामीवीर फलंदाज आहे. त्याबरोबरच त्याने तमिळनाडू संघाकडून यष्टामागेही उत्कृष्ट भूमिका बजावली आहे. वयाच्या २१व्या वर्षी जगदीशनने देशांतर्गत क्रिकेट खेळायला सुरुवात केली होती. ऑक्टोबर २०१६ मध्ये मध्य प्रदेशविरुद्धच्या रणजी ट्रॉफी स्पर्धेत प्रथम श्रेणी क्रिकेटमध्ये पदार्पण केले होते. त्या सामन्यात जगदीशनने ८ चौकार आणि २ षटकार मारत नाबाद १२३ धावांची अफलातून खेळी केली होती. एवढेच नव्हे तर, तो त्या सामन्यात सामनावीरदेखील ठरला होता.
जगदीशनने आतापर्यंत २३ प्रथम श्रेणी सामने खेळले आहेत. त्यात त्याने ४ शतके आणि ४ अर्धशतके ठोकत ११७४ धावा केल्या आहेत. तर, ‘अ’ दर्जाच्या क्रिकेटमधील त्याची कामगिरीही उल्लेखनीय आहे. जगदीशनने २३ ‘अ’ दर्जाच्या क्रिकेट सामन्यात १ शतक आणि ५ अर्धशतके केली आहेत. यासह त्याने ७९० धावांची आपल्या खात्यात नोंद केली आहे.
पण, त्याला टी२० क्रिकेटमध्ये जास्त चांगली कामगिरी करता आली नाही. जगदीशनने देशांतर्गत टी२० क्रिकेटमध्ये २२ सामने खेळले आहेत. त्यात त्याची सर्वाधिक धावसंख्या ३५ इतकी आहे. त्याने २३.४६च्या सरासरीने फक्त ३०५ धावा केल्या आहेत. तरीही धोनीच्या सीएसके संघाने आयपीएल २०१८ लिलावात जगदीशनला २० लाख रुपयांना विकत घेतले होते. पण संघात धोनीसारखा दिग्गज यष्टीरक्षक फलंदाज उपलब्ध असल्यामुळे त्याला अजूनही आयपीएलमध्ये पदार्पण करता आलेले नाही.
परंतु, जगदीशन यंदा खूप फॉर्ममध्ये असल्याचे दिसत आहे. त्याने फेब्रुवारी २०२०मध्ये सौराष्ट्रविरुद्धच्या रणजी ट्रॉफी सामन्यात तब्बल १८३ धावांची अफलातून खेळी केली आहे. यात त्याच्या २२ चौकार आणि ५ षटकारांचा समावेश आहे.
तर दूसऱ्या बाजूला गेल्या एक वर्षापासून क्रिकेट न खेळलेला धोनी आंतरराष्ट्रीय क्रिकेटमधून निवृत्त झाला आहे. याबरोबरच त्याची आयपीएल कारकिर्दही लवकरच संपण्याची शक्यता आहे. त्यामुळे धोनी निवृत्त होण्यापुर्वी आपल्या सीएसके संघासाठी एक दमदार यष्टीरक्षकाचा शोध घेईल, जो त्याची कमी पूर्ण करेल. अशात, जगदीशनला ही संधी मिळवू शकते. त्यामुळे कदाचित जगदीशनचे आयपीएल पदार्पणाचे स्वप्न यावर्षी तरी पूर्ण होईल.
महत्त्वाच्या बातम्या-
या संघाचा प्रतिभावान खेळाडू म्हणतो, ‘धोनीसारखेच मलाही चांगला फिनिशर बनायचे आहे’
सचिन तेंडुलकरने शेअर केला व्हिडीओ; म्हणाला, माझा नवीन मित्र परत आला आहे
एबी डिविलिअर्सला ‘या’ फलंदाजामध्ये दिसते स्वतःचीच झलक
ट्रेंडिंग लेख-
असे ३ परदेशी खेळाडू, ज्यांचा फॉर्म संघाला देणार आयपीएल विजेतेपद
सहाव्या क्रमांकाचा फलंदाज सलामीवीर बनला आणि इतिहास घडवला
फक्त इंजिनीअरिंगचं शिक्षण घेतलेल्या क्रिकेटर्सची खास प्लेअिंग ११