‘माही’ची विकेट घेतल्यानंतर आता ‘या’ गोलंदाजाने केले विराट कोहलीला टार्गेट; म्हणाला…

भारतीय वेगवान गोलंदाज चेतन सकारियाने आयपीएल हंगामात चांगली कामगिरी केली होती. मागील वर्षी त्याला राजस्थान राॅयल्स संघाने १.२ कोटी रुपयांना खरेदी केले होते. मेगा लिलावापूर्वी त्याला संघात परत केले नव्हते. यावर्षी त्याला आयपीएल लिलावात दिल्ली कॅपिटल्स संघाने ४.२० कोटींना विकत घेतले आहे. त्याने लिलावात त्याची मूळ किंमत ५० लाख रुपये ठेवली होती. मागील हंगामात त्याने १४ विकेट्स घेतल्या आहेत. त्याला आयपीएलच्या १५ व्या हंगामात एका दिग्गज खेळाडूची विकेट घ्यायची आहे.

श्रीलंका दौऱ्यावर त्याला भारतीय संघात (IND vs SL) पदार्पणाची संधी मिळाली होती. त्याला मागच्या लिलावापेक्षा तिप्पट जास्त किंमत मिळाली आहे. आयपीएलच्या १५व्या हंगामात तो दिल्ली संघाकडून गोलंदाजी करताना दिसणार आहे. सर्व खेळाडूचे स्वप्न असते की, एका मोठ्या गोलंदाजाला बाद करावे. तसेच, चेतन सकारियाचे सुद्धा स्वप्न आहे की, त्याला भारताचा माजी कर्णधार विराट कोहलीची विकेट घ्यायची आहे.

चेतन एका मुलाखतीत म्हणाला, “एमएस धोनीची विकेट घेणे ही २०२१ मधील माझ्यासाठी सर्वात मोठी गोष्ट आहे. माझे क्रिकेटमधील पदार्पण सुद्धा खास होते, परंतु धोनीची विकेट घेणे माझ्यासाठी खास होते. तो खेळाचा महानायक आहे आणि एका दिग्गज फलंदाजाला गोलंदाजी करणे आणि त्याला बाद करणे ही खूप मोठी भावना आहे.”