टीम इंडियाने अमेरिकेविरुद्धच्या (USA) आपल्या पहिल्या सामन्यात अप्रतिम कामगिरी करत २९ धावांनी विजय मिळवला. या सामन्यात टीम इंडियाचा कर्णधार सूर्यकुमार यादवने आपल्या धडाकेबाज फलंदाजीच्या जोरावर प्रत्येकाला त्याचे कौतुक करण्यास भाग पाडले. सूर्या बॅटने काय कमाल करू शकतो हे आपल्या सर्वांना माहीतच आहे, परंतु गेल्या काही दिवसांपासून त्याच्या फॉर्मवर सातत्याने प्रश्नचिन्ह उपस्थित केले जात होते. मात्र, २०२६ या वर्षातील हे त्याचे चौथे आंतरराष्ट्रीय अर्धशतक होते. त्याची ही शानदार फलंदाजी पाहून टीम इंडियाचे मुख्य प्रशिक्षक गौतम गंभीर देखील स्वतःला त्याची स्तुती करण्यापासून रोखू शकले नाहीत. सूर्यकुमार यादवच्या या उत्कृष्ट खेळीबद्दल गौतम गंभीर नेमकं काय म्हणाले, ते जाणून घेऊया.
टी-२० विश्वचषक २०२६ मधील पहिला सामना जिंकल्यानंतर टीम इंडियाच्या ड्रेसिंग रूममध्ये आनंदाचे वातावरण पाहायला मिळाले. यावेळी मुख्य प्रशिक्षक गौतम गंभीर यांनी सूर्यकुमार यादवच्या खेळीचे कौतुक करताना सांगितले की, “आज आम्हाला एक चांगला विजय मिळाला. सूर्याची खेळी म्हणजे एक ‘मास्टर क्लास’ होता आणि ती खरोखरच अद्भूत होती. टी-२० क्रिकेटमध्ये आपण ज्या परिस्थितीत होतो, त्या संदर्भात ही खेळी पाहता ते खरंच अविश्वसनीय होते.” बीसीसीआयने (BCCI) सोशल मीडियावर एक व्हिडिओ शेअर केला असून त्यामध्ये गंभीर हे बोलताना दिसत आहेत.
सूर्यकुमार यादवने या खेळीत ४९ चेंडूंचा सामना करत ८४ धावांची धडाकेबाज खेळी साकारली. त्याने १७१ च्या स्ट्राईक रेटने फलंदाजी करत १० चौकार आणि ४ उत्तुंग षटकार ठोकले. याचसह तो टी-२० आंतरराष्ट्रीय क्रिकेटमध्ये भारतीय भूमीवर सर्वात जास्त षटकार मारणारा फलंदाज बनला आहे. त्याने रोहित शर्माचा विक्रम मोडीत काढत नवा इतिहास रचला. आता सूर्याच्या नावावर ८६ षटकार झाले आहेत, तर रोहित शर्माच्या नावावर भारतातील टी-२० सामन्यांमध्ये ८५ षटकार आहेत.
