पाचव्या कसोटीत जसप्रीत बुमराह खेळणार की नाही? प्रशिक्षकांचे मोठे वक्तव्य! म्हणाले…

Jasprit Bumrah: लंडनच्या केनिंग्टन ओव्हलमध्ये 31 जुलैपासून भारत आणि इंग्लंड यांच्यात कसोटी मालिकेतील पाचवा आणि शेवटचा कसोटी सामना खेळला जाईल. भारतीय संघ हा सामना जिंकून मालिका 2-2 च्या बरोबरीत संपवू इच्छितो. मात्र, भारतीय संघासाठी हे इतके सोपे नसेल. या मालिकेत आतापर्यंत भारतीय संघाच्या फलंदाजांनी चांगले प्रदर्शन केले आहे, परंतु संघाची गोलंदाजी अजूनही तितकी प्रभावी ठरलेली नाही. पाचव्या कसोटीपूर्वी बुमराहबाबत सर्वात मोठा प्रश्न आहे की, तो ओव्हल कसोटी सामन्यात खेळणार की नाही. याबाबत भारताच्या प्रशिक्षकांनी सांगितले आहे की, याचा निर्णय सामन्याच्या दिवशी घेतला जाईल. (Jasprit Bumrah Oval Test)

जसप्रीत बुमराहच्या पाचव्या कसोटी सामन्यातील खेळण्यावर भारतीय संघाचे फलंदाजी प्रशिक्षक सितांशु कोटक यांनी मोठे विधान केले आहे. 29 जुलै रोजी झालेल्या पत्रकार परिषदेत कोटक म्हणाले की, “जसप्रीत बुमराहच्या खेळण्यावर अजून कोणतीही चर्चा झालेली नाही. तो पूर्णपणे फिट आहे. पण आम्ही लवकरच त्याच्या वर्कलोडवर निर्णय घेऊ. तो या सामन्यात खेळणार की नाही, याचा निर्णय सामन्यापूर्वी प्रशिक्षक आणि कर्णधार मिळून घेतील.” (Sitanshu Kotak statement)

कसोटी मालिका सुरू होण्यापूर्वी भारतीय संघाचे मुख्य निवडकर्ता अजीत आगरकर यांनी सांगितले होते की, वर्कलोड व्यवस्थापनामुळे बुमराह इंग्लंड दौऱ्यावर फक्त 3 कसोटी सामने खेळेल. (Workload management Bumrah) त्याने या मालिकेत 3 सामने खेळले आहेत. बर्मिंगहॅममध्ये खेळल्या गेलेल्या दुसऱ्या कसोटी सामन्यात जसप्रीत बुमराह खेळला नव्हता. बुमराह या मालिकेत इंग्लंडचा कर्णधार बेन स्टोक्सनंतर दुसरा सर्वाधिक विकेट्स घेणारा गोलंदाज आहे. स्टोक्सने या मालिकेत 17 विकेट्स घेतल्या आहेत, तर बुमराहने 14 विकेट्स घेतल्या आहेत.

जसप्रीत बुमराह जर शेवटच्या सामन्यात खेळला, तर त्याच्याकडे एक मोठा रेकाॅर्ड मोडण्याची संधी असेल. तो इंग्लंडमध्ये सर्वाधिक कसोटी विकेट्स घेणारा भारतीय गोलंदाज (Most Test Wickets in England by Indian Bowler) बनू शकतो. सध्या हा रेकाॅर्ड भारतीय संघाचा वेगवान गोलंदाज इशांत शर्माच्या नावावर आहे, त्याने तिथे 15 सामन्यांमध्ये 51 विकेट्स घेतल्या आहेत. तर बुमराहने 12 सामन्यांमध्ये 51 विकेट्स घेतल्या आहेत; त्याला इशांतच्या पुढे जाण्यासाठी फक्त एका विकेटची गरज आहे. तसेच, बुमराहने जर 3 विकेट्स घेतल्या, तर तो वसीम अक्रमला मागे टाकून इंग्लंडमध्ये कसोटीत सर्वात यशस्वी आशियाई गोलंदाज (Most Successful Asian Bowler in England Tests) बनेल. अक्रमने इंग्लंडमध्ये 53 विकेट्स घेतल्या होत्या.