T20 वर्ल्ड कप 2026 मधील भारत विरुद्ध पाकिस्तान सामन्याबाबत गेल्या अनेक दिवसांपासून वाद सुरू आहे. पाकिस्तानने १५ फेब्रुवारीला भारताविरुद्ध होणाऱ्या सामन्यावर बहिष्कार टाकण्याची घोषणा केली होती, मात्र आता आपल्या निर्णयावरून यू-टर्न घेत त्यांना खेळण्यासाठी तयार व्हावे लागले आहे. यादरम्यान शाहिद आफ्रिदीचा एक व्हिडिओ सोशल मीडियावर प्रचंड व्हायरल होत आहे. नेहमीप्रमाणे यातही तो भारताविरुद्ध विष ओकताना दिसत आहे.
सध्या संपूर्ण पाकिस्तान बिथरलेला आहे, जे त्यांच्या विधानांमधून स्पष्टपणे जाणवत आहे. खरं तर, पाकिस्तानचे माजी क्रिकेटपटू आधी या गोष्टीमुळे आनंदी होते की त्यांच्या देशाने भारताविरुद्ध सामना खेळण्यास नकार दिला होता. त्यांना वाटले की यामुळे बीसीसीआय (BCCI) किंवा आयसीसी (ICC) दबावाखाली येईल, परंतु याच्या उलट पीसीबीवरच (PCB) दबाव वाढत गेला आणि शेवटी त्यांना भारताविरुद्ध खेळण्यासाठी राजी व्हावे लागले. शाहिद आफ्रिदीचा जो व्हिडिओ व्हायरल होत आहे, त्यात तो म्हणत आहे की, भारताला फक्त ४ गुजराती चालवत आहेत.
’समा’ या पाकिस्तानी टीव्ही चॅनलवरील एका शो दरम्यान शाहिद आफ्रिदी म्हणाला की, “इंडियाला ४ गुजराती चालवत आहेत. २ विकत आहेत आणि २ चालवत आहेत. जर खालच्या स्तरावर काम करणाऱ्यांना फक्त याच चौघांना खुश करायचे असेल, तर गोष्टी अशा चालत नाहीत.” आफ्रिदीच्या बोलण्यातून हे स्पष्ट दिसत होते की, आयसीसीसमोर पाकिस्तान क्रिकेटची हतबलता आणि अवस्था पाहून तो किती निराश आहे.
भारत आणि पाकिस्तान T20 वर्ल्ड कपमध्ये एकाच गटात (A) समाविष्ट आहेत. या दोघांमध्ये १५ फेब्रुवारी रोजी कोलंबोच्या आर. प्रेमदासा स्टेडियमवर सामना होणार आहे. पाकिस्तानने जेव्हा या सामन्यावर बहिष्कार टाकण्याचा निर्णय घेतला होता, तेव्हा सूर्यकुमार यादवने स्पष्ट केले होते की, विरोधी टीम येवो किंवा न येवो, टीम इंडिया सामना खेळायला जाईल. भारत सुरुवातीपासून आपल्या भूमिकेवर ठाम राहिला, पण शेवटी पाकिस्तानला झुकावे लागले.
