नाद करा पण आमचा कुठं! जसप्रीत बुमराहचा मायदेशात डंका; ५ विकेट्स घेत श्रीलंकन फलंदाज धाडलं तंबूत

भारत आणि श्रीलंका संघात दुसरा आणि अंतिम कसोटी सामना बंगळुरू येथे खेळला जात आहे. हा दिवस-रात्र कसोटी सामना आहे. या सामन्याच्या दुसऱ्या दिवशी श्रीलंका संघाचा पहिला डाव १०९ धावांवर संपुष्टात आला. ८६ धावांवर ६ विकेट्स या धावसंख्येपासून पुढे खेळताना श्रीलंका संघाला आपले ४ विकेट्स गमावत फक्त २३ धावाच जोडता आल्या. भारतीय संघाने पहिल्या डावाच्या आधारावर १४३ धावांची आघाडी घेतली. यादरम्यान भारतीय कसोटी संघाचा उपकर्णधार जसप्रीत बुमराहने शानदार गोलंदाजी केली. त्याने १० षटकात अवघ्या २४ धावा देत ५ विकेट्स घेतल्या. बुमराहने भारतात पहिल्यांदाच कसोटीत ५ विकेट्स घेण्याचा कारनामा केला आहे. त्याने कसोटीच्या एका डावात ८व्यांदा ५ विकेट्स घेतल्या आहेत.

या डावात बुमराहव्यतिरिक्त आर अश्विन आणि मोहम्मद शमी यांनीही प्रत्येकी २ विकेट्स आपल्या नावावर केल्या. श्रीलंकेविरुद्ध कोणत्याही भारतीय गोलंदाजाने केलेली ही सर्वोत्तम कामगिरी आहे. बुमराहने ५ विकेट्सपैकी ३ विकेट्स या सामन्याच्या पहिल्या दिवशी घेतल्या होत्या, तर उर्वरित २ विकेट्स घेत त्याने श्रीलंका संघाचा पहिला डाव स्वस्तात संपवण्यात मोलाचे योगदान दिले. यापूर्वी इशांत शर्माने २०१५ साली कोलंबो येथील कसोटीत ५४ धावा देत ५ विकेट्स घेतल्या होत्या. तसेच, वेंकटेश प्रसाद यांनी २००१ साली कँडी कसोटीत ७२ धावा देत ५ विकेट्स घेण्याचा कारनामा केला होता. झहीर खानही इतक्याच धावा देऊन श्रीलंकेविरुद्ध ५ विकेट्स घेतल्या आहेत.