रोमहर्षक ठरलेल्या या सामन्यात इंग्लंडने नेपाळविरुद्ध कसातरी विजय मिळवला. १८५ धावांच्या लक्ष्याचा पाठलाग करताना नेपाळच्या फलंदाजांनी उत्कृष्ट कामगिरी करत १८० धावांपर्यंत मजल मारली. दुर्दैवाने, मोठा उलटफेर करण्यापासून नेपाळचा संघ अवघ्या ५ धावा दूर राहिला. जरी विजय इंग्लंडचा झाला असला, तरी सर्वत्र कौतुक मात्र नेपाळचेच होत आहे. स्वतः माजी इंग्लिश कर्णधारानेही नेपाळच्या या कामगिरीची जबरदस्त प्रशंसा केली आहे.
शेवटच्या चेंडूपर्यंत रंगलेल्या या चित्तथरारक सामन्यात इंग्लंडला विजय मिळाल्यानंतर मायकल वॉनने आपल्या ‘एक्स’ (ट्विटर) अकाउंटवर लिहिले की, “काय अफलातून क्रिकेट सामना होता! नेपाळच्या खेळाडूंनी ज्या प्रकारची कौशल्ये दाखवली ती लाजवाब आहेत. इंग्लंडसाठी हा केवळ एक विजय आहे.” शेवटच्या षटकात नेपाळला विजयासाठी १० धावांची गरज होती. मात्र, सॅम करनने टिच्चून गोलंदाजी करत शेवटच्या ओव्हरमध्ये केवळ ६ धावा दिल्या आणि इंग्लंडच्या संघाला नामुष्कीपासून वाचवले.
नेपाळकडून शेवटच्या षटकांमध्ये लोकेश बामने बॅटने धुमाकूळ घातला. त्याने अवघ्या २० चेंडूंत ३९ धावांची नाबाद खेळी केली. एका क्षणी असे वाटत होते की, लोकेश आपल्या तुफानी फलंदाजीच्या जोरावर नेपाळला विजय मिळवून देईल. मात्र, शेवटच्या षटकात सॅम करनने टाकलेल्या सलग यॉर्कर चेंडूंवर लोकेशला मोठे फटके मारता आले नाहीत.
नेपाळ संघाच्या या कामगिरीचे सोशल मीडियावर प्रचंड कौतुक होत आहे. डेल स्टेनने त्यांचा खेळ पाहून सोशल मीडियावर लिहिले की, जर नेपाळ संघाला त्याच्या मार्गदर्शनाची (services) गरज भासली, तर तो त्यासाठी पूर्णपणे तयार आहे. दुसरीकडे, युवराज सिंगने लिहिले की, अशाच कामगिरीमुळे संघ प्रगती करतो आणि चॅम्पियन खेळाडू घडतात.
