फाफ डू प्लेसिसचे वय आता ४१ वर्षांहून अधिक आहे, तरीही त्याची ऊर्जा अनेक तरुण खेळाडूंपेक्षाही अधिक आहे. आंतरराष्ट्रीय क्रिकेटमधून निवृत्ती घेऊन अनेक वर्षे झाली असली, तरी तो विविध टी-२० लीगमध्ये नियमितपणे खेळत आहे. अलीकडेच, डू प्लेसिसने यंदाच्या ‘मेजर लीग क्रिकेट’ (MLC) हंगामातील सलामीच्या सामन्यात शतक झळकावून इतिहास रचला. त्याच्या या शतकाच्या जोरावर, टेक्सास सुपर किंग्सने २२१ धावांचे लक्ष्य सहज गाठले.
यंदाच्या एमएलसी हंगामाची सुरुवात दिमाखदार झाली. सलामीचा सामना टेक्सास सुपर किंग्स आणि सिएटल ऑर्कास यांच्यात झाला. प्रथम फलंदाजी करताना, सिएटल ऑर्कासचा सलामीवीर टिम सायफर्टने शानदार शतक ठोकले आणि ६६ चेंडूंमध्ये १०४ धावा केल्या. त्याच्या खेळीत ८ चौकार आणि ६ षटकारांचा समावेश होता, ज्यामुळे सिएटल ऑर्कासला २० षटकांत २२० धावांची भक्कम धावसंख्या उभारता आली.
एका टप्प्यावर असे वाटले होते की टेक्सास सुपर किंग्ससाठी हे लक्ष्य गाठणे कठीण जाईल, परंतु त्यांचा कर्णधार फाफ डू प्लेसिसने आपल्या आक्रमक फलंदाजीने सामन्याचे चित्रच पालटून टाकले.
टेक्सास सुपर किंग्ससाठी सलामीला आलेला साईतेजा मुक्कामल्ला पहिल्याच चेंडूवर शून्यावर बाद झाला. मात्र, फाफ डू प्लेसिसने दुसऱ्या टोकाला खंबीरपणे उभे राहून आक्रमक फलंदाजी सुरू ठेवली. रायली रुसोनेही धडाकेबाज खेळी करत अवघ्या २१ चेंडूंमध्ये ४९ धावा केल्या.
दरम्यान, कर्णधार फाफ डू प्लेसिसने २०० हून अधिकचा स्ट्राईक रेट राखत अवघ्या ४५ चेंडूंमध्ये आपले शतक पूर्ण केले. तो ५२ चेंडूंमध्ये ११३ धावांवर नाबाद राहिला. त्याच्या खेळीत ९ चौकार आणि ७ षटकारांचा समावेश होता. ज्यामध्ये त्याने २१७.३१ चा स्ट्राईक रेट राखला. टेक्सास सुपर किंग्सने अवघ्या १८.३ षटकांत ४ गडी गमावून २२१ धावा करत सामना जिंकला.
फाफ डू प्लेसिसने आतापर्यंत एमएलसीमध्ये एकूण चार शतके ठोकली आहेत, जी या स्पर्धेतील सर्वाधिक संख्या आहे. विशेष म्हणजे, वयाच्या ४० व्या वर्षानंतर त्याने तीन टी-२० शतके झळकावली आहेत; या वयानंतर एकापेक्षा जास्त टी-२० शतके करण्याचा पराक्रम इतर कोणत्याही फलंदाजाला जमलेला नाही.
एमएलसीमध्ये ‘टेक्सास सुपर किंग्स’कडून खेळताना फाफने आतापर्यंत २६ डावांत १,०४७ धावा केल्या आहेत. त्याची सरासरी ४३.६२ आणि स्ट्राईक रेट १६७.२५ इतका आहे. यामध्ये त्याने ४ शतके आणि ६ अर्धशतके नोंदवली आहेत. ही आकडेवारी इतकी प्रभावी आहे की ती तरुण खेळाडूंनाही लाजवेल.
