आयपीएल 2024 च्या गुणतालिकेत कोलकाता नाइट रायडर्सचा संघ अव्वल स्थानावर राहिला. त्यानंतर क्वालिफायर 1 मध्ये विजय मिळवून त्यांनी थेट फायनलमध्ये प्रवेश केला. फायनलमध्ये सनरायझर्स हैदराबादचा 8 गडी राखून पराभव करत केकेआरनं तिसऱ्यांदा आयपीएल ट्रॉफीवर नाव कोरलं आहे. केकेआरचा संघ यापूर्वी 2012 आणि 2014 मध्ये आयपीएल चॅम्पियन बनला होता.
कोलकाता नाईट रायडर्ससाठी हा संपूर्ण हंगाम अप्रतिम राहिला. या हंगामात संघानं फलंदाजी, गोलंदाजी आणि क्षेत्ररक्षण अशा तिनही क्षेत्रांत उत्तम कामगिरी केली. या बातमीद्वारे जाणून घ्या, असे कोणते 5 कारणं आहेत, ज्यामुळे केकेआर आयपीएल 2024 चं विजेतेपद जिंकू शकला.
1) सुनील नारायणची अष्टपैलू कामगिरी – गौतम गंभीर आयपीएल 2024 मध्ये केकेआरचा मेंटॉर म्हणून परतला. तो येताच त्यानं पुन्हा एकदा सुनील नारायणकडे सलामीची जबाबदारी सोपवली. मग काय, नारायणच्या बॅटमधून चौकार-षटकारांची आतषबाजीच सुरु झाली! या हंगामात नारायणनं 14 सामन्यांत 488 धावा ठोकल्या. सर्वात महत्त्वाची गोष्ट म्हणजे त्यानं सुमारे 181 च्या जबरदस्त स्ट्राईक रेटनं फलंदाजी केली. याशिवाय त्यानं चेंडून आपली छाप सोडत 17 विकेट घेतल्या. केकेआरला चॅम्पियन बनवण्यात नारायणच्या या अष्टपैलू कामगिरीचा मोठा वाटा आहे.
2) मिचेल स्टार्कचा प्लेऑफमधील जलवा – मिचेल स्टार्कनं 2015 नंतर या वर्षी आयपीएलमध्ये पुनरागमन केलं. स्टार्कसाठी केकेआरनं तब्बल 24.75 कोटी रुपयांची बोली लावली होती. अशाप्रकारे तो आयपीएलच्या इतिहासातील सर्वात महागडा खेळाडू बनला. मात्र साखळी टप्प्यातील सामन्यांमध्ये या दडपणामुळे स्टार्क खूप महागडा ठरला. एकेकाळी त्याला केकेआरचा सर्वात कमकुवत दुवा असंही म्हटलं जात होतं. मात्र संघानं त्याला पाठिंबा दिला, आणि प्लेऑफमध्ये त्यानं स्वत:ला सिद्ध केलं. स्टार्कनं सनरायझर्स हैदराबाद विरुद्धच्या क्वालिफायर 1 सामन्यात 3 बळी घेतले आणि अंतिम सामन्यात 2 विकेट्स घेतल्या. या दोन्ही सामन्यांतील कामगिरीसाठी त्याला ‘प्लेअर ऑफ द मॅच’ पुरस्कारानं गौरवण्यात आलं.
३) गौतम गंभीरचा गुरुमंत्र – या हंगामात गौतम गंभीर केकेआरमध्ये मार्गदर्शक म्हणून परत आला होता. गंभीरनं याआधी 2012 आणि 2014 मध्ये कोलकाताला त्याच्या नेतृत्वाखाली चॅम्पियन बनवलं होतं. मात्र गंभीर आता एक मार्गदर्शक म्हणून कोलकाता संघाला काही फायदा करून देऊ शकेल का, असा प्रश्न उपस्थित होत होता. गंभीरच्या नेतृत्वात आणि कोचिंगमध्ये देखील आक्रमकतेची झलक पाहायला मिळते. त्याची आक्रमक रणनीती आणि गुरुमंत्रांमुळे केकेआरच्या खेळाडूंमध्ये विजयाची भूक दिसून येत होती.
४) श्रेयस अय्यरचं उत्कृष्ट नेतृत्व – श्रेयस अय्यरच्या नेतृत्वगुणांना कमी लेखणं ही इतर संघांसाठी मोठी चूक ठरली आहे. अय्यरची परिस्थितीला वाचण्याची क्षमता आणि गौतम गंभीरची आक्रमक रणनीती यांच्या मिलाफानं केकेआरचा संघ आयपीएल 2024 चा चॅम्पियन बनला. यापूर्वी 2020 मध्ये अय्यरनं त्याच्या नेतृत्वाखाली दिल्ली कॅपिटल्सला अंतिम फेरीत नेलं होतं, जिथे त्याचा मुंबई इंडियन्सकडून पराभव झाला होता. मात्र यावेळी अय्यरनं कोणतीही चूक न करता केकेआरला तिसऱ्यांदा ट्रॉफी जिंकवून दिली.
5) जादूई फिरकी जोडी – आयपीएल 2024 मधील केकेआरच्या गोलंदाजीवर नजर टाकली, तर हर्षित राणा आणि वैभव अरोरा सारखे नवीन प्रतिभावान गोलंदाज उदयास आलेले दिसतात. मात्र त्यांच्यासोबतच सुनील नारायण आणि वरुण चक्रवर्ती या जादुई फिरकी जोडीनंही कोलकाताला ट्रॉफीपर्यंत पोहोचवण्यात खूप मदत केली. चक्रवर्ती या हंगामात कोलकाताकडून सर्वाधिक बळी घेणारा गोलंदाज होता. त्यानं 21 विकेट घेतल्या. तर त्याचा फिरकी साथीदार सुनील नारायण 17 विकेट घेतल्या.
महत्त्वाच्या बातम्या –
सुनील नारायण IPL 2024 चा सर्वात मौल्यवान खेळाडू! तिसऱ्यांदा पुरस्कार जिंकून रचला इतिहास
केकेआरनं तिसऱ्यांदा कोरलं ट्रॉफीवर नाव! सनरायझर्स हैदराबादवर मिळवला ऐतिहासिक विजय
