आपल्या आंतरराष्ट्रीय कारकिर्दीचा वादग्रस्त शेवट झाल्यानंतर 12 वर्षांनी, केविन पीटरसन पुन्हा इंग्लंड संघात परतला आहे. 2027 वनडे विश्वचषकाच्या पार्श्वभुमीवर त्याला इंग्लंड पुरुष संघामध्ये मोठी जबाबदारी मिळाली आहे.
केविन पीटरसनची इंग्लंडच्या पुरुष ‘व्हाइट-बॉल’ संघांची विशेष मार्गदर्शक (स्पेशालिस्ट मेंटर) म्हणून नियुक्ती करण्यात आली आहे. इंग्लंड क्रिकेटने सोमवारी (7 ऑगस्ट) ही माहिती अधिकृतपणे जाहीर केली आहे.
इंग्लंडचा माजी कर्णधार पीटरसन या महिन्याच्या अखेरीस श्रीलंकेविरुद्ध होणाऱ्या वनडे मालिकेसाठी ब्रेंडन मॅक्युलमच्या व्हाईट बॉल संघात सामील होईल. त्याच्या प्रशिक्षक संघात मार्कस ट्रेस्कोथिक, टिम साउथी, जीतन पटेल आणि सारा टेलर यांचाही समावेश असेल.
पीटरसनने आपल्या 10 वर्षांच्या आंतरराष्ट्रीय कारकिर्दीत, इंग्लंडसाठी 136 वनडे आणि 37 टी 20 सामने खेळून 5500 हून अधिक धावा केल्या. तसेच, त्याने 104 कसोटी सामन्यांमध्ये 23 शतके आणि 35 अर्धशतकांच्या सहाय्याने 8181 धावा केल्या.
पीटरसनने 2025 च्या इंडियन प्रीमियर लीग दरम्यान दिल्ली कॅपिटल्ससाठी मार्गदर्शक म्हणून काम केले होते आणि पुढील 15 महिन्यांत तो आपला दांडगा अनुभव संघांसोबत आणि वैयक्तिक खेळाडूंसोबत काम करण्यासाठी वापरेल.
पीटरसनचा जन्म दक्षिण आफ्रिकेत झाला. तो तेथे लहानाचा मोठा झाला असून पुढील विश्वचषक दक्षिण आफ्रिकेत खेळला जाणार आहे. यावेळी त्याचा अनुभव इंग्लंड क्रिकेटच्या कामी येईल. आयसीसी पुरुष वनडे विश्वचषक 2027 स्पर्धा दक्षिण आफ्रिकेसह नामिबिया आणि झिम्बाब्वे येथे खेळला जाणार आहे.
केविन पीटरसन त्याला मिळालेल्या नव्या जबाबदारीबाबत म्हणाला “दक्षिण आफ्रिकेत विश्वचषक जिंकण्याच्या प्रवासात या संघाला मदत करण्याची संधी मिळाल्याचा मला प्रचंड अभिमान वाटतो. 2014 नंतर प्रथमच पुन्हा इंग्लंडचा युनिफॉर्म परिधान करणे हा एक मोठा सन्मान आणि अत्यंत खास क्षण आहे.”
“आमच्याकडे अत्यंत प्रतिभावान व्हाईट-बॉल संघ आहे, आणि या खेळाडूंसोबत प्रत्यक्ष काम करून त्यांची क्षमता सर्वोत्तम पातळीवर नेण्यासाठी अथक परिश्रम करण्यास मी उत्सुक आहे. पुढील 12 महिन्यांसाठी मॅक्युलमच्या गटाचा भाग बनणे ही एक विलक्षण संधी आहे, आणि मी कामाला सुरुवात कधी करणार याची प्रतीक्षा आहे,” असेही पीटरसनने पुढे म्हटले आहे.
इंग्लंडच्या मर्यादित षटकांच्या संघाचे मुख्य प्रशिक्षक मॅक्युलम यानेही आपले मत व्यक्त केले. त्याने म्हटले, “केपीबद्दल आणि त्याने या खेळात जे काही मिळवले आहे त्याबद्दल माझ्या मनात प्रचंड आदर आहे. त्याने इंग्लिश क्रिकेटवर एक अद्भुत प्रभाव टाकला आहे, त्यामुळे त्याच्यासारख्या अनुभवी, ज्ञानी आणि प्रतिष्ठित व्यक्तीने या संघात भूमिका बजावण्याची इच्छा व्यक्त करणे, ही एक विलक्षण गोष्ट आहे.” (former England captain Kevin Pietersen has been appointed to England’s white-ball coaching team as a specialist mentor.)
