भारताच्या सर्वात यशस्वी कर्णधारांपैकी एक असलेल्या सौरव गांगुली यांनी त्यांच्या ताज्या मुलाखतीत सांगितले की व्हीव्हीएस लक्ष्मण त्यांच्यावर नाराज होते आणि 3 महिने त्यांच्या सोबत बोलले नाहीत.
पीटीआयला दिलेल्या मुलाखतीत सौरव गांगुली यांनी अनेक खुलासे आणि किस्से शेअर केले. ते म्हणाले की कर्णधार म्हणून माझ्यासाठी सर्वात कठीण काम म्हणजे हरभजन सिंग आणि अनिल कुंबळे यांच्यापैकी एकाची निवड करणे. “पाच दिवसांच्या कसोटीत बाहेर बसून विश्रांतीचा आनंद घेणारे हे खेळाडू नव्हते, हे असे खेळाडू होते जे येऊन विचारायचे की मी का खेळत नाही? परिस्थिती माझ्यासाठी अनुकूल आहे. असे चॅम्पियन खेळाडू असणे ही खूप मोठी गोष्ट आहे, ज्यांना सतत सामने खेळायचे होते आणि संघासाठी जिंकायचे होते.”
व्हीव्हीएस लक्ष्मणचे नाव देशातील दिग्गज क्रिकेटपटूंमध्ये घेतले जाते, त्यांची कारकीर्दही उत्तम होती पण तरीही त्यांनी कधीही विश्वचषक खेळला नाही. 2003 च्या विश्वचषकापूर्वी त्यांना संघातून वगळण्यात आले होते, त्यांची जागा दिनेश मोंगिया यांनी घेतली. या निर्णयामागे कर्णधार सौरव गांगुली यांचा हात होता. आता त्यांनी इस्कोबद्दल उघडपणे सांगितले की त्यानंतर लक्ष्मणने 3 महिने त्यांच्याशी संबंध ठेवला नाही.
या मुलाखतीत गांगुली म्हणाले, “यानंतर लक्ष्मण नाराज आणि अस्वस्थ होत. मी हे सर्व नीट करेपर्यंत तो 3 महिने माझ्याशी बोलला नाही. विश्वचषकासारख्या मोठ्या स्पर्धेतून बाहेर पडल्याने कोणीही नाराज होईल, विशेषतः लक्ष्मणसारख्या उत्तम खेळाडूला जास्तच वाईट वाटणार. त्याचे नाराज होणे स्वाभाविक होते. विश्वचषकानंतर तो आनंदी होता की आमच्या संघाने चांगली कामगिरी केली.”
गांगुली पुढे म्हणाले, “जेव्हा आम्ही एकदिवसीय संघात परतलो तेव्हा त्याने पाकिस्तान आणि ऑस्ट्रेलियामध्ये शानदार कामगिरी केली. आम्ही पहिल्यांदाच पाकिस्तान मध्ये सामना जिंकला आणि व्हीव्हीएस लक्ष्मणने त्यात महत्त्वाची भूमिका बजावली.”
पीटीआयशी बोलताना गांगुली गौतम गंभीरच्या प्रशिक्षणाबद्दल म्हणाले, “तो त्याची जबाबदारी चांगली बजावत आहे. त्याची सुरुवात थोडी हळुवार होती, तो ऑस्ट्रेलिया आणि न्यूझीलंडविरुद्ध हरला पण नंतर संघाने चॅम्पियन्स ट्रॉफी जिंकली. इंग्लंडविरुद्धची मालिका त्याच्यासाठी मोठी असणार आहे. मी त्याच्यासोबत काम केलेले नाही पण तो उत्साही आहे. मी त्याच्यासोबत खेळलो आहे, तो एक उत्तम व्यक्ती आहे आणि वरिष्ठांचा खूप आदर करतो.”
