टीम इंडिया आणि दक्षिण आफ्रिका यांच्यातील एकदिवसीय मालिका संपली आहे. टीम इंडियाने ही मालिका 2-1 ने जिंकली आहे. मालिका जिंकल्यानंतरही मुख्य प्रशिक्षक (Head Coach) गौतम गंभीर फारसे आनंदी दिसले नाहीत. गंभीर यांनी कसोटी मालिकेत झालेल्या पराभवानंतर झालेल्या ट्रोलिंगचीही आठवण करून दिली. या दरम्यान, एका प्रश्नाचे उत्तर देताना भारतीय मुख्य प्रशिक्षक गंभीर थोडे संतापलेले दिसले. त्यांनी इशारे-इशाऱ्यात दिल्ली कॅपिटल्सच्या सह-मालकाला सुनावले.
विशाखापट्टणम वन-डे सामन्यात विजय मिळवल्यानंतर टीम इंडियाचे मुख्य प्रशिक्षक गौतम गंभीर पत्रकार परिषदेसाठी आले. तिथे एका पत्रकाराने त्यांना प्रश्न विचारला की, ‘मैदानाबाहेर (off the field) येणाऱ्या बातम्या तुम्ही कशा हाताळता?’ या प्रश्नाच्या उत्तरावर गंभीर भडकून म्हणाले, ‘आम्ही पहिली कसोटी केवळ 30 धावांनी हरलो होतो, तेव्हा संघाचा सर्वोत्तम कसोटी फलंदाज आणि कर्णधार फलंदाजी करू शकला नव्हता, हे लोक आणि मीडिया विसरले आहेत. बरेच लोक खूप काही बोलत आहेत, काही लोक तर आपल्या मर्यादेपलीकडे जाऊन बोलत आहेत, जसे की एका आयपीएल मालकाने स्प्लिट कोचिंगची (Split Coaching) सूचना दिली. आम्ही कोणाच्या मर्यादेत जात नाही, म्हणून लोकांनी आपल्या मर्यादेत राहाणे महत्त्वाचे आहे.’
आयपीएल (IPL) टीम दिल्ली कॅपिटल्सचे सह-मालक पार्थ जिंदाल यांनी दक्षिण आफ्रिकेविरुद्ध 2-0 ने कसोटी मालिका वाईट पद्धतीने हरल्यानंतर सोशल मीडियावर कोचिंगबद्दल एक टिप्पणी केली होती. त्यांनी म्हटले होते की, ‘आम्ही कुठेही जवळपास नाही, मायदेशात किती वाईट पराभव झाला! मायदेशात आमची कसोटी टीम इतकी कमकुवत कधी होती हे आठवत नाही!!! जेव्हा रेड बॉल स्पेशलिस्ट निवडले जात नाहीत तेव्हा असेच होते. हा संघ रेड बॉल फॉर्मेटमधील (Red Ball Format) आमची ताकद अजिबात दाखवत नाही. आता वेळ आली आहे की भारताने कसोटी क्रिकेटसाठी एक स्पेशलिस्ट रेड-बॉल कोच ठेवावा.’
