टी२० क्रिकेट असो वा विश्वचषक, दक्षिण आफ्रिकाच पडलीय श्रीलंकेवर भारी; यंदा पलटणार का बाजी?

आयसीसी टी२० विश्वचषक २०२१ च्या सुपर १२ फेरीत शनिवार रोजी (३० ऑक्टोबर) दक्षिण आफ्रिका आणि श्रीलंका हे संघ आमने सामने येणार आहेत. गट १ मधील या संघांचा हा सामना टी२० विश्वचषकातील २५ वा सामना असून शारजाहच्या मैदानावर उभय संघ भिडणार आहेत. दक्षिण आफ्रिका आणि श्रीलंका यांनी आतापर्यंत या हंगामात प्रत्येकी २ सामने खेळले असून त्यातील १ सामना जिंकण्यात या संघांना यश आले आहे. त्यामुळे शनिवारी होणाऱ्या लढतीत या संघांपैकी कोणाचे पारडे जड असेल हे जाणून घेण्याची सर्वांना उत्सुकता असेल.

दक्षिण आफ्रिका आणि श्रीलंका यांच्यातील मागील ५ टी२० सामन्यांविषयी बोलायचे झाल्यास, याचा निकाल एकतर्फी असल्याचे दिसते. दक्षिण आफ्रिका संघाने गेल्या ५ सामन्यांपैकी पाचही सामन्यात विजय मिळवला आहे.

टी२० क्रिकेटमधील या दोन्ही संघांची एकूण आमने सामने कामगिरी पाहायची झाल्यास, आतापर्यंत उभय संघांमध्ये १६ सामने रंगले आहेत. यातील तब्बल ११ सामन्यांमध्ये दक्षिण आफ्रिकेने बाजी मारली आहे. तर केवळ ५ सामने जिंकण्यात श्रीलंका संघाला यश आले आहे. अर्थातच एकंदर टी२० क्रिकेटमध्येही दक्षिण आफ्रिकेपुढे श्रीलंकेच्या संघाचे पारडे झुकते राहिल्याचे दिसते.

अगदी टी२० विश्वचषकामध्येही दक्षिण आफ्रिकेच्या संघाचेच श्रीलंकेवर वर्चस्व राहिल्याचे दिसते. या स्पर्धेत श्रीलंका विरुद्ध दक्षिण आफ्रिका यांच्यात आतापर्यंत ३ सामने झाले असून त्यातील २ सामने दक्षिण आफ्रिकेने आणि केवळ १ सामना श्रीलंकेने जिंकला आहे.