आयसीसी टी-20 विश्वचषक 2026 ला सुरुवात झाली असून, 15 फेब्रुवारीला कोलंबोमध्ये होणाऱ्या भारत विरुद्ध पाकिस्तान (IND vs PAK) सामन्याकडे सर्वांचे लक्ष लागले आहे. पाकिस्तानने या सामन्यावर बहिष्कार टाकण्याचा निर्णय घेतला होता, मात्र आता सकारात्मक संकेत मिळत आहेत.
श्रीलंका क्रिकेट बोर्डाच्या विनंतीनंतर, पीसीबी (PCB) पुन्हा एकदा आपल्या सरकारशी चर्चा करण्यास तयार झाले आहे, त्यामुळे चाहत्यांच्या मनात या हाय-व्होल्टेज सामन्याची आशा पुन्हा जागृत झाली आहे.
या सर्व वादाच्या पार्श्वभूमीवर एक मोठी बातमी समोर येत आहे. बांगलादेश क्रिकेट बोर्डाचे (BCB) प्रमुख सध्या पाकिस्तानच्या दौऱ्यावर असून दोन्ही बोर्डांमध्ये महत्त्वाची बैठक सुरू आहे. विशेष म्हणजे, बांगलादेशला पाठिंबा दर्शवण्यासाठीच पाकिस्तानने भारताविरुद्धच्या सामन्यावर बहिष्कार टाकण्याचा निर्णय घेतला होता. सुरक्षेच्या कारणास्तव बांगलादेश संघाने विश्वचषकासाठी भारतात येण्यास नकार दिला होता. त्यांच्या या निर्णयामुळे त्यांच्या जागी स्कॉटलंड संघाचा स्पर्धेत समावेश करण्यात आला आहे. बांगलादेशच्या याच भूमिकेला पाठिंबा म्हणून पाकिस्ताननेही भारतासोबत न खेळण्याचा पवित्रा घेतला होता.
आंतरराष्ट्रीय क्रिकेट परिषद (ICC) सध्या दोन्ही बोर्डांशी चर्चा करून यावर मधला मार्ग काढण्याचा प्रयत्न करत आहे. “खेळाचे हित हे कोणत्याही एका देशाच्या वैयक्तिक निर्णयापेक्षा मोठे असावे,” या विचाराने आयसीसी हा पेच सोडवण्यासाठी प्रयत्नशील आहे.
