निवृत्तीची फक्त औपचारिकता, ‘मि. आयपीएल’ रैनाची आयपीएल कारकीर्द तर तेव्हाच संपली होती!

माजी भारतीय क्रिकेटपटू आणि मिस्टर आयपीएल सुरेश रैना याने मंगळवारी (06 सप्टेंबर) क्रिकेटच्या सर्व स्वरूपातून निवृत्ती जाहीर केली आहे. परदेशी टी20 लीगमध्ये सहभागी होण्यासाठी त्याने हा निर्णय घेतला असल्याचे समजत आहे. अर्थातच आता रैना पुन्हा कधीही आयपीएल खेळताना दिसणार नाही. ऑक्टोबर 2021 मधील राजस्थान रॉयल्सविरुद्धचा सामना त्याचा शेवटचा आयपीएल सामना ठरला आहे. जरी रैनाने आता आयपीएलला अलविदा केला असला, तरीही त्याचा आयपीएलचा प्रवास फार पूर्वीच संपला होता. 

आयपीएल 2022 (IPL 2022) चा मेगा लिलाव 12 आणि 13 फेब्रुवारी 2022 ला झाला होता. या मेगा लिलावात अनेक मोठ्या दिग्गजांवर बोली लागताना दिसली, पण काही खेळाडू असे राहिले ज्यांच्यावर कोणत्याही फ्रेंचायझीने बोली लावली नव्हती. चेन्नई सुपर किंग्जचा महत्वाचा फलंदाज सुरेश रैना (suresh raina) याच्यावरही मेगा लिलावाच्या पहिल्या दिवशी कोणत्याच फ्रेंचायझीने बोली लावली नव्हती आणि तो अनसोल्ड खेळाडूंच्या यादीत सामील झाला होता.

मेगा लिलावाच्या दुसऱ्या दिवशी एक्सलरेटेड लिलाव होता. कमीत कमी या दिवशी फ्रँचायझी अनसोल्ड खेळाडूंना त्यांच्या बेस प्राइसवर विकत घेऊ शकत होत्या. परंतु या दिवशीही रैना दुर्लक्षित राहिला होता.